الثلاثاء، 13 مايو 2008

لا لتصدير الغاز لأسرائيل ..... لا والف الف لا..

ناشد الخ الكريم Eldebug صاحب مدونة philasoof بعمل حمله من جميع المدونات تطالب بوقف تصدير الغاز لأسرائيل
وانا اتمنى نجاح هذه الحمله ولو ان الامل بعيد
ولكن ليس ببعيد على رب العباد شىء فاننا نفعل مايمكننا وليكون حجه لنا لا علينا يوم ان نحاسب والله المستعان .
ولمن يهمه الامر هناك حمله فعلا لوقف تصدير الغاز هذا هو موقعها :
keepourgas.blogspot.com

نرجو المشاركه ونشر الموضوع والله المستعان

اتمنى من الله ان نوقف هذه المصيبه التى ابتلينا بها وحسبنا الله ونعم الوكيل
-------------------------------------------------
تحديث 1
-----------
هذا اللينك عمله الاخ الفاضل arsenalwy للمشاركه فى حمله الغاز اتمنى منكم زيارته
http//www.zshare.net/image/12105759293805bb/

اللهم اعنا فأنت خير معين ..

هناك 49 تعليقًا:

Miss. Sosa يقول...

والله حكومتنا ديه باين عليها كبرت وخرفت .. كل تصرفاتهم سفية ولا عقلانية ... شكلهم مش عارفين الفرق بين الاقتصاد القومي والاقتصاد المنزلى .. فالحين يتشطروا علي الشعب الغلبان ويغلوا عليه الاسعار .. ويروحوا يصدروا منتجاتهم بره برخص التراب .. والله سفهه وعته .. والمفروض نرفع عليهم قضية حجر .

أم أحمد يقول...

تصدقي فكرة هايلة
موضوع تصدير الغاز لإسرائيل حارقني قوي
ولازم فعلا يكون فيه وقفة انا هااشترك معاكم

ياسر يقول...

دول ميقدروش يقولوا لاا معتقدش

يا اختي العزيزة اسرائيل البنت المدللة لماما

امريكا وطبعا كلناعارفين ماما امريكا لما بتغضب

علي حد حصار مميت وبعدين ضرب في بلد ميتة

محاصرة من 12 او 13 سنة زي ما حصل في العراق

او فتنة طائفية لحرب اهلية والشعب يقتل في بعضة

بين سني وشيعي ومسيحي ودة حاليا في لبنان

اما لمصر فهما عملين يدورلها علي خرم ابرة او تلكيك

بالبلدي تدخل في شئؤنا الداخلية بضرب واشعال نار الفتنة

بين مسلم ومسيحي ميعرفوش انهم في الاخر مصريين

واحنا ندي لاسرائيل الغاز علشان تحارب بة اهلنا في فلسطين

في 2008حقوق الانسان والعالم مقدرش يدافع عنهم واحنا نمدهم بالغاز

حاجة تفقع المرارة لاا اتفقعت خلااص

ياسر يقول...
أزال أحد مشرفي المدونة هذا التعليق.
ياسر يقول...

السلام عليكم ورحمة الله وبركاته
انا اسف يا روفي الموضوع دة يعصب

وينرفذ متاسف لاا سلمت ولاا حييت
فائق احترامي وتحياتي
ياسر

rovy يقول...

miss.sosa
اهلا بيكى
تعرفى ان قضية الحجر اللى اقترحتيها دى فكره هايله عاوزين ناخذ رأى محامى فى الحكايه ديه .

ربنا يرحمنا ويقوينا ..
نورتينى واشكر مرورك وتعليقك
خالص تقديرى وتحياتى
rovy

rovy يقول...

ام احمد
اسعدنى وجودك معنا وشرفتينى ويا رب نقدر نعمل حاجه مفيش حاجه بعيده على ربنا .
دام التواصل ودمتى بألف خير
تحياتى
rovy

ghoneem يقول...

أهلاً بيكي

دي حضرتك الموالاةالكاملة لأمريكا
يمين يبقي يمين
شمال يبقي شمال

غاز ...قطن...قمح...أحنا بنبيع كل حاجة خلاص عشان رضا الأم اللي عشانها كل حاجة تهون........

أي حد مش بيسمع كلام ماما يبضرب بالجزمة
وطبعاً احنا مش ينفع ننضرب بالجزمة
عشان احنا مصر
يبقي نسمع الكلام أحسن ونصدر غاز وكل اللي يتمنوه!!!!!!!!!!

تحياتي ليكي
أشكر طبعاً مرورك وحضورك المميز

بالتوفيق..................

rovy يقول...

اخى الكريم ياسر
انا عارفه ان عندك حق فى كل كلمه قلتها و اكيد كلنا بنموت الف مره مع القرارات اللى بتخنقنا ومبنبقاش عارفين نعمل حاجه .. بس ابسط شىء اننا نقول لا .. علشان على الاقل نبقى حاولنا ولما نقابل ربنا نقوله يا رب حاولنا بكل اللى قدرنا عليه وانت خير الشاهدين .. احنا حنروح وحتفضل كلمتنا اما كلمه ابيه ومحترمه تشهد لنا .. او كلمه غبيه وفاسده تشهد علينا .
ربنا يلطف بينا ومعلش اسفه لو موضوعى ضايقك لكن غصب عنى مش بأيدى
دمت بخير .. تحياتى
rovy

rovy يقول...

ghoneem
اهلا بيك وبتعليقاتك المتميزه
عارفه ان الحكايه بقت صعبه لكن كان ممكن نلاقى الف حجه لو عاوزين نقول لا
من الاول .
لكن دلوقت الحكايه بقت صعبه وصعبه قوى كمان عارفه بس برضه عارفه اننا على الاقل نبقى عملنا لهم صداع و ما سلمناش و قلنا اللى يشهد علينا ..
وحسبنا الله ونعم الوكيل
خالص تقديرى وتحياتى

rovy

Gannah يقول...

جزاكى الله خير يا روفى
ان شاء الله هننضم بس الموضوع عايز حملة على مستوى الشعب كله
حكومتنا العزيزة بتدى اسرائيل سلاح استراتيجى علشان يموتوا فى الفلسطنيين براحتهم و المصيبة انه باقل من سعره يعنى على حسابنا كلنا و حساب الغلابة اللى بيموتوا فى طوابير العيش
الله ينتقم منهم
هى يعنى الدنيا ضاقت بينا علشان نديه لاعدائنا .. دى لو كانت دولة عربية كنا اديناها الغاز باكتر من سعره الحقيقى
روفى الموضوع ده يحرق الدم
تحياتى

Eldebug يقول...

فعلا يا روفى هوه ده اللى المفروض نعمله ... اننا ننشر الحملة على قد مانقدر لان مش المهم مين عمل ... المهم اتعمل ايه ... وان شاء الله الحملة دى تقدر تعمل حاجة ... وان شاء الله نحاول ننسق مع الحملة دى نشوف احنا ممكن نعمل ايه فى الموضوع ده

وشكرااااااااااااا

Unknown يقول...

فكره ممتازه

الله المستعان

لان الناس دول كل حياتها ماشيه بالغاز...ولو منع عنهم حياتهم هتبقى ف شبه توقف

بس الرك دائما على التحركات اللى هتبنى على رد فعل الناس...اعنى الحكوميه

ياريت يبقى فيه شوية دم بقى وميبقاش التحرك مجهض زى مااتعودنا

يعنى ناس محاصرين اخوانا ومضيقين عليهم يبقى يتحاصروا ويتضيق عليهم

سعدت بمرورى بمدونتك الجميله

بوركتى اختاه

الربان يقول...

تحياتي

في رأيي ان وقف تصدير الغاز لاسرائيل غير ممكن...لان هناك التزاما دوليا في
معاهدة السلام لتزويد اسرائيل بالغاز

لكن علي اقل تقدير ان يتم تصدير الغاز بالاسعار العالمية و ليس كما يحدث الأن ...

اتمني ان يحدث هذا...و تتم مراجعة كل اسعار تصدير الغاز او البترول حتي
تكون بالاسعار الدولية ...طبقا لقانون
العرض و الطلب.

تحياتي و تمنياتي.

Gannah يقول...

روفى
جزاكى الله خيرا بس يا ريت تخلى عنوان موقع الحملة فى البوست عندك لينك علشان الناس تدخل عليه مباشرة و كمان مدونة فيلسوف اللى ابتدت منها الحملة
تحياتى

rovy يقول...

اختى الخبيبه جنه
جزاك الله كل خير ... معلش انا عارفه انه موضوع يحرق الدم بس مش بأيدى والله
نفسى نعمل حاجه تعطينا امل ..
بالنسبه لموقع الحمله هو فعلا فى مدونة فيلسوف لينك وممكن اى حد يدخل من عنده
بس ياريت ننشر فى كل المدونات علشان
يكون فيه نتيجه .. محدش عارف على الاقل زى ما قال الاخ الفاضل الربان
لو ولا بد يكون بالاسعار الدوليه ولو ان حتى لو كده برضه دمنا حيكون محروق وحسبنا الله ونعم الوكيل .
خالص تقديرى لمشاركاتك البنائه و المتميزه دائما ودمت بالف خير
تحياتى
rovy

rovy يقول...

eldebug
اتمنى اننا فعلا نقدر نعمل اى حاجه نرفع بها معنوياتنا ومعنوية الشعب المخنوق ومحروق دمه من الموضوع ده .
اخى الكريم جزاك الله خيرا و اكثر من امثالك ويا ريت فعلا تتابعهم ونحاول نعرف لو لينا اى دور اكيد مش حنتأخر . ودام التواصل على الخير ان شاء الله . دمت بخير
خالص شكرى وتقديرى
تحياتى
rovy

rovy يقول...

حطم القيود
اهلا بك اولا ..
لكى كل الحق فيما تقولى بس يا رب صوتنا يوصل ونقدر نعمل حاجه .
المهم اننا ندخل على موقع المدونه الموجود لينك عند الاخ الكريم eldebug
ونسجل اصواتنا .. جزاك الله خيرا ونورتى المدونه ويارب يدوم التواصل .
خالص تقديرى
تحياتى
rovy

rovy يقول...

الربان
اهلا بك دائما ..
اعلم ان الموضوع صعب بس زى ما قلت محاوله ممكن بها اننا على الاقل نرفع الدعم اللى يحرق الدم عن الغاز المصدر لهم و على الاقل نحافظ على حقوق اولادنا والاجيال الجايه .. والله المستعان .
حسبنا الله ونعم الوكيل
خالص تقديرى وتحياتى
rovy

كيكى عوووووو يقول...

انا جيتتتتتتتتتتت..هيييييييية...والله الواحد دمة محروووووق على الاخر..يموتولنا جنودنا وبناتنا على الحدود..واحنا احم احم ..ربنا على المفترى وابن الا......تحياتى وموضوع فى الجون

Unknown يقول...

تفتكرى هل من مجيب ؟؟!!!!
يارب ما يصدروه ولو متنا من الجوع
تصدقى دا من الاشياء اللى منكدانى جداا كيف نصدر لمن يقتل اخواننا وابنائنا على الحدود كيف نصدر لمن سرق ارضنا واحلامنا واماننا

كل الود

Unknown يقول...

ازيك ياجميل
اتفق معكي قلبا وقالبا بس وحياتك تضيفي للغاز كمان الحديد بتاع عم احمد عز

اللي بيتبني بيه الجدار العازل والله احنا اللي بنموت فلسطين مش اليهود

حسبي الله
تحياتي

PrInCeSS BeRy يقول...

احييكى على الموضوع بجد تسلم ايدك وربنا يهدى حكومتنا

رامى اشرف يقول...

تصدير الغاز لاسرائيل
جزىء من الفساد فى النظام الحاكم فهذا النظام يفعل اى شىء وباى طريقه للحفاظ على حكمه ولكى يضمن ولاء الامريكان عنه فهذا الطريق
مثلما كان الطريق لكبت الحريات لتعديل الدستور لاى شىء مهما كان سلبى على المواطنين المهم الحفاظ على الحكم والكرسى
واتمنى نجاى اى محواله لوقف هاذا التصدير ولكن انا على يقين بان لن يحدث شىء
تحياتى

ياسر يقول...

السلام عليكم ورحمة الله وبركاته
فوت للاطمنئان ولم اجد جديد
الله يهديهم يارب
تحياتي
ياسر

rovy يقول...

كيكى العسوله
اهلا بيكى نورتى يا قمر
عندك حق فى حكاية حرق الدم والله انا حاسه انى حرقت دم كل الناس بالبوست ده حقك عليا ولو ان مش بأيدى .
تحياتى
rovy

rovy يقول...

نهر الحب
اهلا بيكى .. معلش ادينا بنحاول نعمل حاجه اى حاجه تحسسنا اننا لسه موجودين وبندافع عن حقنا وحق اولادنا .
والله خير معين .

شكرى وتحياتى
rovy

rovy يقول...

bar2ash
اهلا بيك .. الحمد لله اننا متفقين المهم اننا نوصل صوت اتفاقنا ويعرفوا اننا حاسين قوى بالظلم ..لاننا بجد اتظلمنا احنا والاجيال اللى جايه لو ملحنقاش وعملنا حاجه .
ياااااارب نقدر
تحياتى
rovy

rovy يقول...

princess bery
اهلا بيكى .. اسعدنى مرورك الكريم
اميييييين يارب .. دعوتك حلوه قوى
وكمان اكيد زى ما فيها ناس بتخطأ لازم يكون فيها ناس بتصلح وهو ده عشمنا .. يااااارب
نورتينى ودام التواصل
تحياتى
rovy

rovy يقول...

رامى اشرف
اهلا بيك اولا..
صدقنى عندى امل ان زى ما فى ناس بتخطأ فيه ناس تصلح وتقدر تعمل حاجه ..
اسعدنى مرورك الكريم
تحياتى

rovy

rovy يقول...

ياسر
دايما بأسعد بوجودك واهلا بيك فى اى وقت .. البيت بيتك .
الحقيقه ما فيش جديد بس يا ريت تكون دخلت على الموقع من مدونة فيلسوف وتركت توقيعك ويا ريت كمان ما تنساش تزور مدونة قولا سديدا فيه اخبار جديده .. دمت بخير
تحياتى
rovy

shaimaa elgarhy يقول...

غااااااااااااااااز.....بووووووم

بصراحه حكايه الغاز دى ولعت فى راسى

بقالها سنه تقريبا كده من ساعه ماقريت مقاله لاستاذى الفاضل \إبراهيم عيسى فى جريدة الدستور

بيقولك بقه ايه ياستى قال إن حكومتنا المبجله بتصدر الغاز الطبيعى عن طريق خطوط عبر النيل المصيبه بقه مش فى كده ...لأنهم مقتنعين إن ده بيزنس واحنا مالناش دعوة علشان احنا عاملين معاهده السلام من ايام عم بيجن..
ولو خالفناها هناخد بالموأخذه فوق دماغنا...

المشكله بقه تمكن فى ايه ؟؟؟ هقولك اهو

المشكله ان حكومتنا كمان طلعت مابتعرفش فى البيزنس...اه بجد والله

لما تبيع الغاز الطبيعى بتراب الفلوس مش عارفه الاااااااااااااااد ايه بكام شيكل...يلا ربنا المستعان

امل يقول...

السلام عليكم
ازيك يا روفي
معلش اني اتأخرت في التعليق
بس النت مكانش مظبوط اليومين اللي فاتو
ان شاء الله هطير دلوقتي
واسيب توقيعي

موناليزا يقول...

اختى الحبيبة:اولا اشكرك جدا لتعليقك عندى فماتتصوريش كلامك خفف عنى ازاى
ربنا يسعدك ويكرمك يارب
اما عن الحملة فقد نوهت عن هذا الخبر من قبل فى تدوينتى "لاتتخذوهم أولياء"
ويارب صوتنا يوصل للجميع
جزاكم الله خيرا ودمتى بصحة وسعادة

doctor mohamad يقول...

)هى بلدنا و لا عزبتهم؟!( .. يبدو إن مشاكلنا كلها مرتبطة ببعض و كلها منشأها العصابة اللى ماسكين البلد و مسميين نفسهم حكومة .. و الحل إنهم يتغيروا.. و مش هيتغيروا إلا إذا إحنا اتغيرنا .. موضوع حيوى أثارتيه .. ربنا يوفقك.

الفراشة الصغيرة يقول...

اكيد لا والف لا

حتى لو حملتنا دى مكنتش نتائجها قويه
يكفينا شرف المحاوله
فانا معاكم ان شاء الله
فى الحمله

rovy يقول...

shaimaa elgarhy
اهلا بكى
نورتينى .. واكيد عندك حق.. صفقه خايبه معرفناش حتى نعملها .
اسعدنى مرورك ودام التواصل
تحياتى
rovy

rovy يقول...

امل
وحشتينا ويارب النت ما يقطعش ابدا علشان بجد بتوحشينا .
دمت بخير فى رعاية الله
تحياتى
rovy

rovy يقول...

monaliza
اختى الحبيبه الحمد لله انك بخير .. بتشكرينى على ايه ياريت بجد كان ممكن اقدر واعملك اى حاجه تخفف عنك بس انا متأكده انك جادعه قوى وان اللى حصل ده حيقويكى و حيعلمك ويزيدك ايمان وحكمه .. ربنا معاكى وياريت نطمن عليكى دايما . وتأكدى ان فيه ناس كثير قوى بيحبوكى و قلوبهم ودعواتهم ليكى .
جزاك الله خيرا ووفقك واسعد ايامك .
وان شاء الله الايام الجايه نطمن عليكى
خالص تقديرى وتحياتى
rovy

rovy يقول...

doctor mohamad
اهلا بيك يا دكتور واسعدنى مرورك الكريم
اكيد زى ما فيه ناس بتغلط فيه ناس ممكن تحاول وتصلح وده اللى بنتمناه
ربنا يوفقنا لما فيه الخير ..
لك خالص تقديرى وتحياتى
ودمت بخير
rovy

rovy يقول...

الفراشه الصغيره
اهلا بأرق فراشه .. اسعدنى وجودك معانا .
دام التواصل وربنا يوفقنا لما فيه الخير ان شاء الله .
دمت بخير وسعاده
تحياتى
rovy

مشتاق لله يقول...

انا موافق لاتصدير للغاز -طيب يااختي والاستيراد انتي عارفه اننا نستورد من اسرائيل اكثر المواد الغذائية والمواد الطبية - طيب ماذا عن السياحة المشتركة _ماذا عن توشكي ودهب وشرم الشيخ -ياسيدتي ياريت كان الموضوع مجرد انبوب غاز ويتقفل -المشكلة ان اسرائيل موجودة علي جدول الحكام ياسيدتي لو كان بمقدورك تدليني علي طريقة اشطب بيها اسرائيل من جدول الحكام بالله عليك دليني عشان الصداع الي في نافوخي يروح -ولك السلام

رئـــــيسـة حزب الأحلام يقول...

السلام عليكم
بجد ياريت نقف وقفة ضد تصدير الغاز لاسرائيل عشان بجد حاجة تكسف
وتحيلتى لكى

بنات صاحبة الجلالة يقول...

روفي

تسلمي ياقمر علي الموضوع بس احنا مش هنقول لا لتصدير الغاز مفروض نقول لا لنكسة الغاز اللي بيحصل دا نكسة وعار علينا كمصريين لما مصر تبيع الغاز لإسرائيل بـ75 سنتا إلى دولار للمليون وحدة حرارية بريطانية وهو سعر يقل تسع مرات عن سعر السوق لأنه بإمكانها تصديره لأي مكان بالسعر العالمي الذي يقترب من 12 إلى 14 دولارا

هنقول اية بس

حسبي الله ونعم الوكيل

موضوعك هايل ياقمر

وفقك الله

تحياتي

rovy يقول...

مشتاق لله
اهلا بيك
عندك حق اكيد فى كل اللى بتقوله ..
مصيبه كبيره بيدفع ثمنها اجيال واجيال وربنا يستر الامراض مليتنا من يوم مستوردنا منهم مجناش يوم قدام ..
والمصيبه اننا اعتمدنا عليهم ونسينا ان حوجتنا ليهم دى اكبر من اكبر المصائب . لكن نكسه الغاز دى حاجه ثانيه يعنى احنا رافضين مجرد التطبيع وهما بياخذوا الغاز مدعم فيه مصيبه اكبر من كده ..
حنقول ايه حسبنا الله ونعم الوكيل
اشكر مرورك الكريم ودام التواصل
ودمت بخير اخى الفاضل
تحياتى
rovy

rovy يقول...

رئيسة حزب الاحلام
اهلا بيكى ..اختى الحبيبه :
عارفه انها حاجه تكسف واللى يكسف اكثر انهم كمان يأخذوه برخص التراب
يعنى حتى حقنا المادى على ابسط الحدود ضايع .. ونقول ايه القول ضايع .
نورتينى واسعدنى مرورك
خالص تقديرى وتحياتى
rovy

rovy يقول...

بنات صاحبة الجلاله
اهلا بيكم ووحشتونى ..
اكيد عندك حق هى فعلا نكسه والحمله اسمها لا لنكسة الغاز انا عارفه بس انا حسيت انى عاوزه اقول انى رافضه مجرد تصديره لهم ما بالك بالنكسه اللى ما يعلم مداها الا الله .. ربنا يستر .
نورتنى زيارتكم ودمتم ثلاثتكم بخير
خالص تقديرى وتحياتى
rovy

مجداوية يقول...

السلام عليكم

جزاك الله كل خير لوضع الرابط وتفعيل جمع التوقيعات
ايجابية ووطنية وان شاء الله حانضم للحملة بتوقيعى

اشكرك الشكر الجزيل اختى الكريمة

rovy يقول...

الاخت مجداويه
اشكر حماسك وايجابيتك ..جزاك الله خيرا واكثر من امثالك .
خالص شكرى و تقديرى لمرورك الكريم و دام الله التواصل . ودمت بخير
تحياتى
rovy