الخميس، 22 مايو، 2008

تذكرونى

تذكرونى .... اذا نامت عيونى.. تذكرونى
اذاهدأت انفاسى وتلاشت شجونى
... تذكرونى

حين يمضى قطارى مودعا
سلام لكل من احبونى
تذكرونى
حين يذبل زهرى وحين تجف اوراق غصونى
تذكرونى
وعندما اسافر بلا عوده
انتظر ولا اعلم متى ستأتونى
تذكرونى
عندما افارق وليس بيدى حيله
فلتدعوا لى .. احبابى .. وتذكرونى
تذكرونى
فانا منكم وبكم .. .. احببتونى واحببتكم ..
فاذا غابت غدا شمسى ..
عدونى ان لا تنسونى .. وبين الحين والحين .. تتذكرونى
و.......تذكرونى ......
.................... تذكرونى ..............................

هناك 51 تعليقًا:

rovy يقول...

عاوزه اعتذر لكل اللى اتضايق او حس بتشاؤم فى البوست ده والله انا فعلا مش عاوزه حد يتضايق بس احيانا بتجيلى فكره لاغنيه او بيتين شعر منغير ما اكون عرفه الوحى ده جه ليه وامتى
وياحس انى عاوزه اكتب الكمات اللى بتدفق فى عقلى و خلاص ..
ما اخبيش عليكم انا حسيت بخوف بعد ما كتبت البوست ده و بصيت لمريم بنوتى الصغيره و دعيت ربنا يدينى العمر و اربيها يا رب ..
مش حاطول عليكم ومتزعلوش وعمر الشقى بقى .. بس انتم ادعوا لى وما تدعوش عليا ..

monaliza يقول...

ياحبيبتى كده تخضينا عليكى
ايه بس مالك يا روفى ايميلى معاكى كلمينى عليه عشان اطمن عليكى
ربنا يخليكى ويبارك فى عمرك يارب ومايحرمناش منك ابدا
روفى هستناكى تطمنينى عليكى يارب تكونى بخير
واحب اطمنك ان اللى يعرفك لا يملك الا انه يدعيلك لانك بجد ونعم الاخت والصديقةولديك قدرة فائقة(ماشاء الله)على التأثير فى الاخرين وزرع حبك فى قلوبهم
عايزة افكرك بحاجة كمان "الابذكر الله تطمئن القلوب"
اللهم ارزقك راحة البال والاطمئنان وحلاوة الايمان وجعل كل اعمالك طاعة ورزقكى الفردوس الاعلى بلاحساب امين يارب العالمين

rovy يقول...

monaliza
حبيبتى امه الله والله العظيم انا بخير والحمد لله ومفيش اى حاجه حصلت .. اسفه قوى لأنى قلقتك والله ما كنش قصدى انا بعد ما كتبت البوست نعيت همك انتى بالذات وعلشان كده كتبت اول تعليق اطمنكم فيه .. ياسمين وهدير زعلوا منى لما قرأوا البوست و حسسونى بالذنب والله مش عارفه انا ليه حسيت بالكلام ده وكتبته .. ان شاء الله خير .. وبعدين انا ياما كتبت حاجات حزينه زمان والحمد لله ما حصليش حاجه و زى ما قلتلك عمر الشقى بقى .. مجرد ابيات اوحيت بها فكتبتها ولو استنيت شويه كنت حأنساها .. اسفه .. اسفه جدا لقلقك .
انا ضيفتك على الايميل فى الياهو عندى بس انتى لسه ما ضفتنيش اعمليلى ادد
عندك .. ان شاء الله حنتكلم قريب .
ارجوكى سامحينى ومتحسسنيش بالذنب انتى كمان ..
كل الود والتقدير
rovy

كيكى يقول...

روفى........
انا جيت والله من امبارح بفكر فيكى...اجى القى تذكرونى....من فكركى من غير حاجة ....المهم انا جاية اقولك خبر حلووووووووو...انا النهاردة حليت حلو فى الامتحان..بعد الامتحان الخامس والعشرون.لولىوووووووووو...قلت افرحك....يلى زغردى....واشترى جورنال الجمهورية حلو اوووى لبتدائى.....يلا بقى نرقص ونغنى بامناسبة السعيدة دى...حليت...حليت. واييييييييييييييية

rovy يقول...

كيكى
انا فرحانه قوى علشانك وعلشان انتى فرحانه ربنا يفرحك دايما وان شاء الله
تحلى فى كل المواد اللى جايه حلو ويارب تنجحى انتى وبناتى وكل ولاد وبنات المسلمين ... قولى امييين .
دمت بخير حبيبتى
rovy

Gannah يقول...

روفى
هو فيه ايه؟ هو ده اختبار اعصاب ولا ايه؟ لو كده فانا سقطت بالثلث.
فيه ايه يا روفى؟ انت يا بنتى مش شايفة المدونات اللى حواليكى كلها اكتئاب و دموع و كان املنافى الله ثم فيكى.
بقولك ايه شوفى انت اكلتى ايه ولا شربتى ايه غلط النهاردة و ظبطى امورك.
اذكرونى ايه يا بنتى يا حبيبتى ربنا يبارك فى عمرك و يخليكى لبناتك.
لما عقلك يتدفق فيه الافكار اللى زى دى اشربيلك كوباية ميه ساقعة وهى تروح.
وبعدين البوست الجميل ده كفايه عليه يومين ولا ثلاثة مش لازم تخليه اسبوع ماشى ولا مش ماشى
اتفقنا...
انا ماشية وابقى اذكرينى:)
تحياتى

rovy يقول...

gannah
اسفه والله العظيم اسفه جدا حقك عليا .
اوعدك ان شاء الله ان البوست الجاى حيجى بسرعه و حيكون متفائل ..
بس عارفه رغم انى حسيت بالذنب بس فرحت قوى لما هدير قالت لى :ايه يا مامى هما بيحبوكى قوى كده ساعتها حسيت والله ان ربنا سبحانه وتعالى اكرمنى بيكم اخر كرم ربنا يخليكوا ليه
وما يحرمنيش منكم وخصوصا انتى و امة الله . حقك عليا بقى ما تزعليش .
واكيد طبعا انى اذكرك دوما .. فلا تقلقى ههههههه .
دمتى بخير و سلام
rovy

drpharma يقول...

كلنا فداك يا اختاه وربنا يخليلك مريم

سنووايت يقول...

زيارتي الاولي للمدونة واول موضوع اقراه يكون تذكروني
رغم انه بيحمل بعض الحزن الا انه من نظرة تانية واقعي وفيه حب وولاء , ومش لازم تكون الذكري بعد الرحيل الاجمل انها تكون موجودة في القلب في كل وقت
لكل منا كيان ووجود وذات يضيع كل هذا وتبقي الذكريات

تقبلي مروري

rovy يقول...

drpharma
حقيقى مش عارفه اقولك ايه ..
بأرحب بك اولا و بجد نورتينى واسعدتنى زيارتك .
اشكرك جدا على رقتك وزوقك وانسانيتك
وبعد الشر عنك وعن كل زوارى الكرام .
دمت بخير ودام التواصل ان شاء الله .
تحياتى
rovy

rovy يقول...

سنووايت
معلش والله لو اعرف انك حتشرفينى اكيد ما كنش ممكن انزل البوست اللى واضح انى فى الاخر حأضرب عليه ..
وطبعا عندك حق فى الكلمتين الحلوين اللى رفعتى بهم معنوياتى .
اسعدنى مرورك الكريم و دمتى بخير
دام التواصل ان شاء الله
تحياتى
rovy

ياسر يقول...

عندما افارق وليس بيدى حيله
فلتدعوا لى .. احبابى .. وتذكرونى
تذكرونى
ساعات كتير الانسان مننا بيطلب
فعلاا من احبابة واهلة ان يتذكروة
ويدعون لة بالخير تذكروني
بجد ياروفي كل بوست بتكتبية
اقوي واجمل واروع من الذي سبقة
دومتي مبدعة وصاحبة كلمات فعلاا
تتحس

تحياتي

امل يقول...

السلام عليكي روفي الحبيبة
انتي من الاشخاص الذين احببتهم
في عالم التدوين اعرف ان هذه الكلمات
لا تقصدين بها شيئا ولكنها احزنتني قليلا
ربنا ما يحرمنا من طلتك الجميلة علينا
ويبارك في عمرك وتشوفي بنوتاتك الجميلات
عرايس واذا كانت الكلمات دي عشان اختبار حبك عندنا يبقى ماشي سماح المرة دي لانك غالية عندنا
ربنا يفرح قلبك ويرزقك من فضله

rovy يقول...

ياسر
اسعدتنى بتعليقك كثيرا .. ربنا يخليك .
الحقيقه انا بعد ما حسيت انى من غير ما اقصد فيه ناس بحبهم جدا زعلوا وانا عارفه ان ده لانهم بيحبونى والحمد لله ..
فكرت انى الغى البوست .. تعليقك خلانى غيرت رأى لانك حسيت يعنى ايه تحس انك عاوز تكتب حاجه حاسسها فتكتبها ..
والله ما كان قصدى اختبر حبهم او اقلقهم لانى فعلا بحبهم قوى ..
اشكرك كثيرا .. جزاك الله خيرا ودمت اخا وصديقا مخلصا تساندنى وربنا يخليك ليه .
عاوزه اقولك ان ربنا ما عطنيش اخ وانى بجد حسيتك اخويا .. اتمنى ان يحفظك الله .. خالص تقديرى وتحياتى .
rovy

rovy يقول...

امل الحبيبه
انا حاسه بحبكم والله وده لأنى انا كمان بحبكم قوى وحسيت ان ربنا اهدانى ناس حلوه قوى ناس عرفتها بأحساسى وروحى ودى اعلى درجات المعرفه وحبيتكم وحبتونى من غير اى مصلحه ودى اهم حاجه .
اسفه لو زعلتك من غير ما اقصد ..لان والله انا ما كنش قصدى اختبر حبكم لانى حساه والحمد لله . ربنا يخليكوا ليه وما يحرمنيش منكم ابدا يااااارب .
اشكرك على رقتك ودعواتك الجميله و عوزاكى تعذرينى لانك اكيد عارفه ان الالهام ما لوش وقت وانك احيانا بتحسى بأنك عاوزه تكتبى حاجه فبتكتبيها .
دمت بخير ودمت اخت لى
كل الود والتقدير والاعتذار
تحياتى
rovy

دنيتى الجميله يقول...

هو انا ممكن اقولك حاجه
بس تصدقينى
البوست ده رائع جدا جدا
انتى عارفه انا مبعرفش اكتب شعر ولا حتى بقدر اعبر عن اللى جوايا
بس اللى انتى كتباه ده هو هو نفس اللى انا حساه ونفسى اقولوا لكل حبايبى و اصدقائى
روفى البوست اللى فات حسيت انك بتكلمينى انا والبوست ده حسيت انى انا اللى بتكلم
والله كلامى صحيح
كان ليا خاله بحبها جدا وتوفت ولكنها كان تأثير كبير عليا جدا فى طفولتى وشبابى والى الان وبعد وفاتهادائما اتذكرها واترحم عليها ودايما بسأل نفسى يا ترى ممكن حد يحبنى ويترحم عليا ويتذكرنى بعد وفاتى
فبوست ده نفس الكلام اللى بيدور فى مخيلتى
بارك الله فيكى يا روفى واسعد ايامك ويخليكى لبناتك الحلوين

HANY YASSIN يقول...

السلام عليكم

على الرغم من تعارض وجهات النظر حول الشعر الحر والشعر المقفى الا اننى اجد نفسي متحيزاً دوماً للشعر المقفى
الموسيقى والروح فيه بتكون اروع على الرغم ممن يقولون انه اصبح موضة قديمة وعلى الرغم من حبي للشعر الحر
كى لا اكون ممل قصيدتك فى منتهى الجمال
والموسيقى جعلتنى اقرأ كل النص واستمتع به كاملاً
دام لنا قلمك ايتها الشاعرة الكبيرة
خالص تحياتى واحترامى
هانىيس

rovy يقول...

دنيتى الجميله
انتى فعلا جميله قوى .. ربنا يخليكى ..
بجد كلامك حلو قوى ودايما بيسعدنى تعليقك .
بأعزيكى مره ثانيه فى خالتك العزيزه رحمها الله واسكنها فسيح جناته وغفر لها ولنا وللمسلمين كافة ان شاء الله .
بارك الله فى حياتك وعمرك ورزقك عمرا مديدا ان شاء الله ويا رب يخليلك كل احبابك ويبارك فيهم .
دمتى بخير وسعاده اختى الحبيبه ودام التواصل ان شاء الله .
تحياتى
rovy

rovy يقول...

hany yassin
عليكم السلام ورحمة الله وبركاته
الحقيقه مش عارفه اقولك ايه .. مش لاقيه كلام اعبر به عن امتنانى لتعليقك الكريم .. حقيقى كلامك اخجلنى جدا واكيد من كرمك الكبير وصفك ليه بأنى شاعره كبيره .. فانا ما زلت احاول و كل ما اتمناه ان يوفقنى الله بقراء كرام مثلك .. جزاك الله خيرا ووفقك دائما .
خالص شكرى وامتنانى
تحياتى
rovy

كوارث يقول...

جميل قوي البوست واحساسك عالي فيه
ونغمة الغربة والسفر تقريبًا ليها نفس الايقاع في النفس
فكرة الهجرة من زمان مكانتش محبّبة وبسببها فرض القتال على المسلمين
بحييكي على البوست
واسلوبك جميل

ADAM يقول...

السلام عليكم

روفي

لا تعتذري

فالأدب حالة تترجمها الكلمات

وأعجبني كلامك


ولكنا لن نتذكرك

لأنا لا ننساكي

تحياتي

آدم

ghoneem يقول...

اهلاً بيكي

يافندم حضرتك تحدثتي عن هادم اللذات الذي اذا ذكر في ضيق وسعه واذا ذكر في واسع ضيقه

تحدثتي عنه بحرفية عالية وبأسلوب راقي يشير اليه بشجن من بعيد لبعيد

طريقة التحدث عن الموت اوالفراق تثير الشجن والخوف ....وطريقة حضرتك بالتحدث عنه تحيي القلوب

اللهم أحيي قلوبنا ولا تتوفانا الا وانت راضي عنا....
آمين آمين آمين

تحياتي

بالتوفيق............

مدينه الملائكه يقول...

ايه يا روفي حرام عليكي انا كان قلبي هيوقف
ليه كدا قبضتي قلبي وفكرتيني بان ماما كمان تعبانه
ربنا يديكي الصحه وتربي مريومتك وتجوزيها كمان
ربنا يكرمك انتي بجد نعم الصديقه ونعم الاخت الكبيرة ومش بتنسي حد
وكلامك بيدخل القلب علي طول
خدي بالك من نفسك عشان بناتك وعشانا احنا كمان انتي بتدينا امل في الحياه والله مش مجامله

دمتي بالف صحه وسعادة

اختك مي دة بعد اذنك يعني

وصحيح انا بحاول اضيفك علي Google talk نفسي بجد اكلم معاكي

مشتاق لله يقول...

ارجو ان يتذكروكي ومازال الندي في اوراقك -التحية

nado يقول...

احساسك جميل جدا وعالى برغم التشاءم الفظيع

فيروز

nado يقول...

حرام عليكى ومش عايزه الناس تتخض عليكى ايه يابنتى كنت بتتفرجى على فلم اذكروينى ده مايمنعش ان احساسك كالعاده حالم

rovy يقول...

كوارث
اهلا بيك
اشكر مرورك وتعليقك الكريم
دمت بخير ودام التواصل

تحياتى

---------------------------------------
adam
اشكرك جدا على الكلام الرقيق ده
ربنا يخليك بجد مش لاقيه رد يعبر عن امتنانى .
دمت بخير ودام التواصل
خالص تقديرى وتخياتى

---------------------------------------
ghoneem
دايما بيأسرنى ذوقك فى التعليق لكن المره دى كلامك الراقى والمشجع قوى ده مش ممكن الاقى رد يوفيه .
كل الشكر والامتنان
خالص تقديرى وتحياتى

==========================================
مدينة الملائكه
الف بعد الشر على قلبك ربنا يخليكى ويخليلك ماما .. وبجد حقك عليا ...
مجرد خواطر سطرت كلمات فى ذاكرتى فنقلتها و ما كنش قصدى ابدا انى اقلق حد . كده الجنس الناعم كله اثبت انه رقيق جدا ومش حمل اى حاجه ..
انتى كمان من الناس اللى قابلتهم فى التدوين وحسيت بهم وحبتهم ...
اشكرك جدا على كل الكلام الحلو ده
بالنسبه لحسابى فى جوجل عندى مشكله مش عارفه ادخل عليه خالص ..
لو ما عرفتش احلها حأغير الاميل اللى مكتوب واحوله لحسابى فى الياهو او الهوت
وان شاء الله اكلمك قريب جدا واكيد ده حيسعدنى .
دمت بخير ولكى كل الود
تحياتى
----------------------------------------
مشتاق لله
اشكرك جدا لتعليقك الرقيق والمتميز
وانا كمان ارجوا هذا ..
كل الامتنان والتقدير
تحياتى

rovy

rovy يقول...

nado
معلش يا قمر جنون الادب بقى
ربنا يخليكى و ميحرمنيش منك

==================================

فيروز
سغيده قوى بتعليقك يا قمر
ربنا يخليكوا ليه وميحرمناش من بعض ابدا ..
كل الود لكى اختى الحبيبه

rovy

واحد من البلد دى يقول...

أدام الله قلبك قلب ود
وحب لا يداهمه فراقا
ولا أبكى لكى أختاه عينا
لديكى نحن أصحابا رفاقا
ف حى على الصلاة أختاه و قومى
فى الله حبك بيننا فاق النفاقا
...لم أتعود منكى هذا القتوم أختاه ..
بعد أن تصلى كما طلبت منكى فى بيت شعرى-أرجو أن يكون عجبك-تعالى إلى مدونتى لترفهى عن نفسك.....قليلا
أراح الله قلبك و نفث همك و غمك و أبدلكى بالحزن سعادة و أتاكى الحسنى و زيادة..
دمتى بخير

رئـــــيسـة حزب الأحلام يقول...

اية ياقمر مالك
وربنا يديكى طولة العمر وتفرحىبعيالك
عارفة لو كنتى جيتى حفلة اول امبارح اكيد كنتى هتبقى مبسوطة
على فكرة انا كنت عمالة ادور عليكى
ماجتيش لية
النوبة الجاية اوعى ماتجيش
تحياتى لكى

حسن محمد توفيق يقول...

العزيزة
rovy

لماذا هذا الشعر الحزين

ربنا يمد فى عمرك وتشوفى مريم دكتورة وتجوزيها كمان

لابد لنا ان نتذكر الموت كل لحظة لنعمل من اجل لقاء الله ونعمل على مرضاته فقط
لا ان نتشائم وننتظره

ra7eel يقول...

روفى

كلمات تستحق النظر فيها بعمق
والتفكير فيما سنكون عليه فيما بعد
واعتقد ان الذكرى الطيبه افضل مايتبقى لنا
ربنا يديلك طوله العمر وتشوفى مريم احلى عروسه
تحياتى لكى

الهدهد الطائر يقول...

دا مقلب جامد

دمتي بخير دائما يا أم مريم.

......تحياتي.......

rovy يقول...

واحد من البلدى
اشكرك جدا .. حقيقى ابيات من شاعر وانسان . - اكيد عجبتنى - ..
تقبل الله دعواتك ولك مثلها ان شاء الله اخى الفاضل ..
اشكر لك نصيحتك الغاليه و اؤكد لك اننى والحمد لله فى خير حال وانها مجرد كلمات فى ابيات احسستها وكتبتها ..
لك كل الشكروالامتنان .
دمت بخير .. خالص تقديرى وتحياتى

rovy

rovy يقول...

رئيسة حزب الاحلام
انا بخير يا قمر والحمد لله
اسفه انى ما جيتش الحفله اللى فاتت عندك .. وعاوزه اقولك ان لو حصل واتأخرت عليكى تعرفى انها اكيد ظروف منعانى بس مش ممكن اكون نسياكى .
دمت بخير حبيبتى ودام التواصل ان شاء الله .
كل الود والتحيه
rovy

rovy يقول...

استاذ حسن محمد توفيق
استاذى الفاضل لم اقصد التشاؤم ابدا ولكنها مجرد ابيات اوحيت لى واحسستها
فكتبتها فعذرا اذا كنت قد احزنتكم
اشكر لك سيدى مرورك الكريم وتعليقك المتميز . دمت بخير وسعاده وهناء
خالص تقديرى
تحياتى
rovy

Sally يقول...

الحالة دى بتجيلى كتير على فكرة
ولعجائب القدر عندى النهارده
قاعده أبص لابنى وساكتة واقول ده من غيرى ممكن يعمل ايه ؟

ربنا يخليلنا اولادنا ويخليهم لنا طول مهم محتاجينلنا

أول زيارة وان شاء الله تتكرر
دمتى بخير أختى
سالى

rovy يقول...

ra7eel
اهلا بيكى
اشكر مرورك وتعليقك الكريم
نورتينى يا قمر ..
دمت بخير ودام التواصل
تحياتى
rovy

rovy يقول...

الهدهد الطائر
مقلب ايه لا سمح الله ..
بجد مش فاهمه بس على كل حال نورتنى
واسعدتنى زيارتك
تحياتى
rovy

rovy يقول...

sally

اهلا بيكى فى اول زياره ... نورتينى بجد
ربنا يخليلك ابنك ويخليكى لهو يارب ما يحرمكوش من بعض ابدا ..
اشكر مرورك الكريم و دام التواصل
دمت بخير وسعاده
تحياتى
rovy

الربان يقول...

تحياتي

اه ، لقد اثرتي اشجاننا...و ذكرتينا برحيلنا....فعلنا نعمل صالحا قبل ان تأتي محطتنا و يتوقف قطارنا و ننزل...

و عسي الله ان يرحمنا
و الانسان مخلد بأعمالة الطيبة...تقف
شاهدا لنا...

تحياتي و تقديري

بنات صاحبة الجلالة يقول...

بالعكس كلماتك حلوة اوي وجميلة جدا انا بيعجبني اسلوبك اوي بجد مشاء الله عليكي وبعدين الواحد اكيد بيمر عليه لحظة بيشعر انه متضايق الكلام بيخرج منه حسب حالته مستنين جديدك دايما ياقمر

خالص تحياتنا

نهر الحب يقول...

يا خبر ياروفى
كل دا الم وحزن بداخلك؟؟
مش عارفة اقولك اية بس بجد بوست مؤلم وحزين للغاية
والمنى شخصيا
اوقلك انا بعمل اية فى المواقف دى
بعد اللجوء لله عز وجل
انى احاول اشوف الالم الاخرين
واساعد اللى اقدر عليه
او حتى انى اسمع مشاكل غيرى وان قدرت اساعدهم

توكلى على الله واعلمى ان اشد الناس ابتلاء هم الانبياء والصالحين
ونرجوا ان نكون منهم
كل الود
وربنا يفرج همك وحزنك
ونتنظرى للدنيا بتفائل اكبر

حبيبـــــــة القمـــــر يقول...

روفي الجميله
حقيقي كلماتك جميله وتأثرت بيها جدا
بجد خلتني اخاف وافكر
ياترى بكرة فيه ايه
وبعد الرحيل هيحصل ايه

بجد سلمت يداك

rovy يقول...

الربان
اسفه لاثارة اشجانك ولكن الانسان احيانا يحتاج قليلا منها ليشعر بالحياه
مرورك وتعليقك الكريم يسعدنى دائما .
اشكرك كتيرا وادعو الله ان يحفظك و يجعلك من اهل الجنه بعد عمر مديد ان شاء الله

خالص تقديرى وتحياتى

rovy

rovy يقول...

بنات صاحبة الجلاله
كلماتكم اسعدتنى والحمد لله ..
اشكركم كثيرا وربنا ما يحرمنيش منكم .
كل الشكر والامتنان
تحياتى
=================================================

نهر الحب
اختى الحبيبه انا فغلا لم اقصد ان اشعرك بأى الم.. وصدقينى لو قلتلك مهما مر بى فأنا دائمة التفاؤل منذ تعلمت ان الجأ للرحمن وللرحمن وحده لا شريك له مهما حدث فى حياتى والحمد لله من وقتها عرفت طريق السعاده .
وصدقينى دى مجردابيات او خواطر لكى ان تسميها كما شأتى .
اشكرك حبيبتى على نصائحك الغاليه وعلى دعواتك الثمينه ولكى مثلها ان شاء الله .
دمت بخير حبيبتى و دمتى اخت غاليه
تحياتى

rovy

rovy يقول...

حبيبه القمر
سعيده بيكى جدا لانك حسيتى بالرساله وفهمتيها ..
ربنا يوفقك ويبارك فى عمرك وايامك
دمت بخير ودام التواصل
تحياتى
rovy

واحد من البلد دى يقول...

السلام عليكم
إيه الكسل ده..؟؟
ملحوظة..هوه ماحدش بيسأل ليه عن الأخت مكسوفة..
أنا ملاحظ غيابها من فترة..
لو حضرتك تعرفيها يا ريت تطمنينا..
تحياتى لحضرتك

rovy يقول...

واحد من البلدى
انا مش كسلانه انا بس مش فى المود ومش قادره اكتب اللى وعدت به .. ادعيلى
بالنسبه للاخت مكسوفه انا اسفه لانى فعلا مش عارفاها .. اتمنى انها تكون بخير ولو عرفت اسأل حد حأبقى اطمنك .
دمت بخير
تحياتى
rovy

Walad_Masry يقول...

وعندما اسافر بلا عوده
انتظر ولا اعلم متى ستأتونى
تذكرونى


الموضوع لمس معايا قوي يمكن علشان مسافر .. احتمال

الكلام جميل ومعبر جدا

تحياتي

rovy يقول...

walad masry
اشكرك على تعليقك الكريم اللى خلانى اسامحك على التأخير .
خالص تقديرى وتحياتى

rovy