الجمعة، 8 أغسطس 2008









السلام عليكم ..





كنت وعدت انى اجمع فى بوست واحد الواجبات و التاجات بس بجد لقيت المسأله صعبه فأعذرونى ..


الحقيقه انا عاوزه اتكلم فى البوست ده عن هروب المدونين من الساحه ..


اكثر من مدونه كانت حتغلق فى لحظة يأس او ضيق من صاحبها او صاحبتها و انا شخصيا مريت بالظرف ده فى لحظة غضب خصوصا ان عالم التدوين كان جديد عليه .. لكن الحمد لله بفضل الله و اختى الحبيبه الغاليه جنه ( لولاكى يا جارتى ) سابقا و ( جنه ) حاليا و ايضا الحبيبه الرقيقه امل ( شمس اللقاء ) الحقيقه مش حأقدر انسى وقفتهم بجانبى و قتها ربنا يكرمهم و يجازيهم خيرا .. و بعدها اتأكدت ان الانسان ما ينفعش يكون لوحده و ان احيانا كثيره بنحتاج حد يفكر معانا .. المهم المقدمه دى لأنى لقيت اثنين من المدونين الطيبين اغلقوا مدوناتهم.. amal و ساره البحر ..


اد ايه احزننى ان اثنين من الناس اللى حبتهم ينسحبوا من غير ما يودعونا حتى .. وايه اللى بيحصل لنا و ليه فجأه بنتخنق من التدوين اللى احيانا بيكون احلى حاجه فى حياتنا ,, ليه بتتحول النعمه لتقمه و ليه بنلاقى نفسنا عاوزين نهرب من ساحة التدوين ؟؟؟؟؟؟؟؟


اسئله كثير حيرتنى الفتره اللى فاتت و حبيت انى اشارككم معايا تساؤلاتى .. و اتمنى انى الاقى جواب ولو لبعض الاسئله


كمان عاوزه اقول لكم كلكم كل عام و انتم بخير بمناسبة نصف شعبان اللى قرب و كمان ان شاء الرحمن و ابلغنا رمضان الكريم .. فكل عام والجميع بخير و سعاده و ان شاء الله محققين احلامنا جميعا و احلام امتنا و بلادنا ..

دمتم جميعا بخير و سلام فى حفظ من لا يغفل و لا ينام

هناك 49 تعليقًا:

حاجات جوايا يقول...

السلام عليكم أختى الحبيبة
الحقيقة انا كمان ملاحظة الموضوع ده ومأثر فيا ومستغرباه
ومش عارفة ازاى يقدروا يقفلوا مدوناتهم .. بس اكيد هما أدرى بأسبابهم وظروف الناس مش زى بعضها
المهم ميتعرضوش لأذى نفسى او عصبى بسبب مدوناتهم
فالمدونة ما هى الا مكان لتنفيس المشاعر السلبية والايجابية لصاحبها.. فان تحول الى مصدر ازعاج وقلق .. فلا داعى له

كل عام وانتى بخير اختى الحبيبة
أعاد الله عليك الايام دهورا
وألبسك من لدنه نورا
وبلغك رمضان واعانك على صيامه وقيامه اللهم آمين

سالى

rovy يقول...

حاجات جوايا

اختى الحبيبه سالى

اكيد عندك حق فى ان ممكن يكون لهم ظروفهم .. بس اتمنى انهم ما يكونوش استعجلوا و يرجعوا يندموا خصوصا للناس اللى بتحذف المدونه مش بس بتقفلها و اكيد كمان بيوحشونا والله لما بنكون اتعودنا عليهم ..
على كل حال ادعوا الرحمن ان يكونوا فى احسن حال وان يكونوا سعداء ..
واتمنى ان لا يأتى اليوم ونغلق به مدوناتنا تحت اى ضغط عصبى .. مهما كان
اشكر مرورك المتميز و العطر دائما
و اشكر دعواتك الغاليه والله وانا باقرأها قلت وانت كمان يارب يا سالى
جزاكى الله خيرا وكل عام وانتى بالف خير

ابلغكى الرحمن رمضان و جعلكى و انا معكى ان شاء الرحمن ممن يغفر لهم و يعفو عنهم فى هذا الشهر الكريم .. امين
خالص تقديرى و امتنانى
تحياتى

موناليزا يقول...

كل عام والامة الاسلامية بخير
اما عن هذه الظاهرة فلا اعلم حقا لماذا
اللهم بلغنا رمضان واعنا على صيامه وقيامه
دائما رقيقةو محبة للاخرين
ربنا يباركلك ويكرمك يارب

محمد يقول...

المدونة من المفترض أنها وسيلة للتواصل
وللتعبير بحرية عن تسأولاتنا ,أو عرض أهتماتنا ومشاركة الاخرين فيها.
ولأن المجال متسع جدا لايشمل دائرة ضيقة من المعارف أو حتى على مستوى الوطن فعلى قدر العمل تكون المسؤلية.
وقد يصاب صاحب المدونة بضيق أذا لم يجد من يتواصل معة , ورغم أختلافى مع من يشعر بذلك لأن من وجهة نظرى يجب على من يريد التواصل علية عرض المحتوى الصادق مع أستعمال اللغة والاسلوب
الذى يوصل فكرة للطرف الاخر .
أيضا يكفى توافر مساحة لاخرج ما بداخلنا
شرفتينى جدا بزيارتك فى كلا المدونتين.

الربان يقول...

تحياتي

اولا اشكر حضرتك كل الشكر لسؤالك عني و دعائك لاخي المريض جزاكي الله عنا خير الجزاء.

بالنسبة لغلق المدونة... اعتقد ان البعض منا في لحظة ضيق او لسبب ما مثل
مضايقات بعض المعلقين... قد يتخذ او تتخذ صاحب المدونة قرارة بالتوقف.

بالرغم من ان المدونه وسيلة هامة للتواصل مع الاخرين...

ربنا يهدينا جميعا لصالح الاعمال...و يصلح بالنا .


تحياتي و تقديري.

!!! عارفة ... مش عارف ليه يقول...

كل سنة وانت طيبة روفي

سؤالك جميل وفعلا جدير بالبحث والمناقشة وخصوصا ان في ناس كتير عجبنا قلمهم وبقينا متابعين له وبنستنى الجديد عندهم
إنما قد يكون السبب في عدم التواصل هو ضغوط خارجية مثلا او احساس بالملل والرتابة ناحية التدوين أو ان مفيش افكار جديدة علشان يقدر يحقق بها التواصل وخصوصا ان الموضوع مش سهل بالمرة ومحتاج لمجهود غير عادي علشان تقدري تدوني وكمان علشان تقدري تتواصلي مع اللي حواليكي

وطبعاً مشكلة الافكار الجديدة دي لها علاقة مباشرة بالمووود
وبعدين الموود ده مش بايدنا يعني في عوامل كتيرة ممكن تكون سبب واكتر العوامل دي خارجية

وقد يكون احساس الزهق هو الارجح وقد يكون في بعض الاحيان ضغوط خارجية من المحيطين أو حتى من المدونين بعدم تقدير قيمة التدوين لان في بعض الاحيان بيكون في تعليقات غير لائقة بالمرة ولما يكون في حد صاحب مدونة مثلا ويلاقي ان جزاءه هو السب أو ان حد لا يعرف من هو حتى يسيء له بالفظ .. قطعا من الممكن ان يقرر الانسحاب من الساحة

وعلى سبيل المثال تعرضت لافاظ جارحة من مدونة ذكرت فيها رايي فيما هو مكتوب ولا اختلاف في الرأي اخدت اللي فيه النصيب ألفاظ يعف اللسان عن ذكرها وانا اعتبر رجل عندي قدرة والحمد لله على التحمل وتقييم الموقف وتعففت عن الرد والنزل لهذا المستوى من الحوار
ما بالك ببنت ورأيت كثيرات تعاني من هذه التعليقات ودائما تأتي من غير معررررررررررف

فلو كان الغير معرف رجلاً لقتلته

تحياتي
وليد

HANY YASSIN يقول...

السلام عليكم
ايه اللى بيحصل لنا و ليه فجأه بنتخنق من التدوين اللى احيانا بيكون احلى حاجه فى حياتنا ,, ليه بتتحول النعمه لتقمه و ليه بنلاقى نفسنا عاوزين نهرب من ساحة التدوين ؟؟؟؟؟؟؟؟

هذا طبيعي فالأنسان كائن متغير المزاج ومبيفضلش على حالة واحدة طول الوقت

كل سنة وانتي بألف خير وصحة وسلامة
خالص الأحترام لك
هاني يس

Gannah يقول...

روفى
ازيك؟ يا رب تكونى بخير
الحقيقة مش عارفة الاجابة انا نفسى كتير الايام دى بفكر أخد اجازة من التدوين وان شاء الله رمضان كله هاخده اجازة لانى حاسة ان الواحد محتاج يبعد فترة
كل عام وانت وزوارك بكل خير
تحياتى

امل يقول...

السلام عليكم حبيبتي في الله روفي
فرحت قوي بذكرك لاسمي في البوست ده بس حقيقي فيه كلام كتير جوايا ومش عارفه اخرجه ازاي التدوين ده لما دخلته كنت داخله بالزق من تمر حنة صديقتي المقربة بس لما لقيت تفاعلاتكم معايا وبدأت أنا كمان اتفاعل معاكم حسيت أن ده عالم تاني وكتير برجع من بره وأنا حاسة اني مخنوقه وأول ما أفتح المدونة واسبح مع الاصدقاء الاقي البسمة اترسمت على وشي احساس كأنهم فعلا عائلتي التانية اللي بفرح لفرحهم واحزن لآلآمهم واحيانا أدعي لبعضهم اتخيلي أقول اللهم فرج عن صاحب مدونة كذا ههههه وزي أي مكان في العالم لازم نقابل حاجات تضايقنا وتخلينا نفكر في لحظة اننا نهرب ونسيب كل حاجة ورانا لو ملقيناش وقتها أصحابنا يثبتونا ويفكرونا بحبهم وأكيد اغلبنا فكر في لحظة ما أنه يعمل كده .. مش عارفه شكلي رغيت كتير كفاية كده بقه ههههه
تحياتي وحبي

ياسر يقول...

و ليه فجأه بنتخنق من التدوين ؟
اولاا سؤال ممتاز وعندي الف اجابة علية
والالف اجابة يفرضوا نفسهم عشرة الاف سؤال
انا واحد من الناس كرهت عالم التدوين دة
لان الواحد لما بيكتب فية الا جواة مبيعجبشي
المهم مهاجمات ومعاكسات ونميمة في بعضينا
وليسة امبارح كنت فاتح الا عدادات وبقول يارب قويني
علي مسحها احسن من حرقة الدم والتلقيح علي
بعض في بعض البوستات وبيجي علي البوست دة
تعليقات بجد بتجرح الواحد من داخلة وبتتعبة نفسيا جدا
والاخطر من كدة عملينها احزاب ومجموعات ونسيوا خاالص
الاخوة في الله والمحبة دفي دينا الحنيف.
والاخطر كمان هو الاتهامات الباطلة والادعاءات
الكاذبة
وكمان بعض الناس تيجي وتعيب علي خواطري
والاسم مدنتك عجبتنا بس اخطاء املائية
كاني بمتحن ثانوي عام والمشكلة ناس معرفهمشي
بيذروني لاول مرة وبقول معلشي
الحاجة بقي الا بصراحة تكثف بجد
تلاقي البنات بتذور وبتعلق وبيقراؤء خواطربعض
اما الشباب قليل جدا تشجيعهم لبعض او زيرتهم
لبعض
وربنا يهديني يارب ومعملشي المفاجاءة الا هتزعل
كل الاخوة والاخوات الا بحبهم في الله
لاني تعبت بجد من العالم دة ومن الفاظ كتير
بضايقني جوا العالم دة وربنا يقويني واقدر ابعد عنة
معلشي ياروفي ومتاسف علي الاطالة بس
موضوعك جاني في الوقت الا بجد مخنوق من العالم
دة وكثرة النفاق الا فية ورمي الكلمات واللقيح في البوستات

فائق احترامي وتقديري لاختي الفاضلة
ياسر

ياسر يقول...

اسف ياروفي والله من ختقتي
وضغط اعصابي من العالم دة
نسيت اهنيكي بمنتصف شهر شعبان
واللهم بلغنا الشهر الكريم امين يارب
شهر رمضان الذي انزل فية القراءن
كل عام وانتم بالف خير
اعادة الله عليكم بالخير واليمن والبركات
تحياتي

zOzO يقول...

كل سنه وانتي طيبه يا احلي روفي
يارب بغلك شهر رمضان وانتي بخير يارب
وتكوني احسن واحسن
يارب

فعلا ظاهره زي ما قولتي كدا
انها ظاهره ضيق
بس هيرجعوا
لان المدونه هي الطريق ان الواحد يفك عن نفسه
ويلاقي حد يسمعه
حد يحبه
من غير مصالح والكلام دا


تحياتي ليكي
وكل سنه وانتي طيبه
كمان مره

PrInCeSS BeRy يقول...

روفى ازيك يا حببيتى

بصراحة انا كمان لاحظت الموضوع دة وبعض المدونين بيغلقوا لاسباب غير معلنة او اسباب خاصة انا بزعل اوى لما بلاقى كدة لانهم مبيعملوش حاجة غلط بالعكس بيعبروا عن فكرهم بطريقة مختلفة بس هرجع واقول حرية شخصية بس بيعز علينا فرقا ناس حبيناهم

انتى عثل ومحبة يا روفى للناس باى يا قمر

بنات صاحبة الجلالة يقول...

السلام عليكم ازيك ياحبية قلبي اخبارك اية كل سنة وانتي بالف صحة وسلامة يارب بلغك الله الشهر الكريم وجعلنا جميعا من عتقاء النار ويارب تشوفي مريم وياسمين عرايس لعيالي برضوا ههههههه

انا كمان بقيت كل ماجي ادخل مدونة الاقي حد يقول انا هعتذر انا هقفل مدونتي منهم اللي بيلغيها في لحظة بدون وداع لاي حد من اصحابة المدونين بس احينا في ناس بتضطرها انها تغلق المدونة لظروف خاصة بيهم ممكن يكونوا واجهوا ضغط ولاحاجة او حد رخم بيهربوا من الامر بالابتعاد عن التدوين

انا في راي الشخصي ان المدونة دي بيت الواحد التاني بيكتب فيها كل اللي هو عايزة بيعبر بيه عن حاجة جواه ومفروض الواحد لا يكترث باي مضايقة من اي حد لاننا في مجتمع فيه الكويس وفيه الوحش وزي مانتي ذكرتي التدوين جعل الانسان يكون صداقات جديدة وحقيقة

ربنا يديم المحبة والصداقة بينا يارب

تحياتي

Maha Shahen يقول...

السلام عليكم ورحمة الله وبركاته
انا والله بسئل زيك يا روفى ليه يقفلوا المدونات سارة البحر كانت من احب المدونات فعلا لقلبى
يمكن يرجعوا في يوم لينا من تانى وهيلاقوا مكانهم لسه موجود في القلب
نتمنا مش يغيبوا كتير
واوعى في يوم يا روفى يضيع منك الأمل وتعملى زيهم كدا بقى نقفل مدوناتنا جميعا دا كله الا انتى
انتى النسمه اللي بتطل علينا دايما بكلمات لو اجاز اقول عليها من عبير الجنه
كل سنه وانتى طيبه ورمضان كريم وربنا يتقبل منا جميعا صالح الاعمال يا رب

بسمه عبدالباسط يقول...

ساعات الواحد بيوصل لمرحلة من الضيق بتخليه مضايق من كل حاجة فيقفل مدونتة
وساعات بتكون لظروف أسرية وشخصية يعنى فيه ناس لما تعرف أن ولادها عندهم مدونة بيمنعوهم عنها
وأكيد فيه أسباب كتيرة

وكل سنه وانتى طيبة

تحياتى

غير معرف يقول...

ياااه اده البوست بتاعك سحرنى ..لو التدوين كنت موت او دخلت مصحة نفسية اد اية التدوين بيخرجنى من همومى وبينسينى الدنيا انا بدءت انسى حياتى قبلة

واتمنى ان اى حد عنده بلوج وعايز يدلتها لانها مش عجباه او مش عايز يكمل المشوار ميدلتهاش يسبها

يمكن تحنلها وهتلاقى ان فى غيرك منتظر ان تكتب من جديد ااد اية الواحد مش بيحس بنتيجة عملة وغيرة بيقدرة

ياريت تسبوها لقراءة حتى لو مفيش جديد

البوست هايل والبلوج كمان
ثانكس

حاجات جوايا يقول...

السلام عليكم ورحمة الله وبركاته
ازيك يا روفى
أنا جاية أشكرك لمحاولتك مساعدتى فى مشكلة التعليقات
وفعلا ساعدتينى باظهار تعليقات كانت مختفية وقصرتى عليا الجهد
بجد شكرا يا روفى
جزاكى الله كل خير
وانا رديت على تعليقاتك لو تحبى تشوفيها

وكل سنة وانتى طيبة يا قمر

سالى

جوجو يقول...

السلام عليكم
انا بحيكى كتير فى البداية

بس انا من وجهة نظرى انها بتبقى ظروف نفسية بيمر بيها اى حد فا بيطر انه يهجرالناس

ويبعد عنهم وهو من وجهة نظره ان هو ده الحل الصح
تحياتى

(المهاجر الى الله) يقول...

السلام عليكم ورحمة الله وبركاته
الانسحاب من شىْمعين يخضع عادة الى بعض المعايير تحددها الظروف المحيطة بالمنسحب الذى ربما يكون تحت ضغط من هذه الظروف يقدم على فعل شىْلم يكن يرغب قيه
وربما تكون الظروف دى حاجات كويسة مثل السفر للعمل او الانشغال بالحياه الزوجية والتفرغ لتربية الاولاد
عموما نتمى لهم كل التوفيق فى حيلتهم وآخرتهم.

tarek alghnam يقول...

كل سنه وانتى طيبه
وربنا يعود عليكى الايام بخير
ويارب كل اللى قفل مدونته يرجع لينا ويمتعنا تانى
تقبلى تحياتى
ودمتى بحفظ الله

مجداوية يقول...

السلام عليكم

نورتى وشرفتى مدونتى يا روفى
ربنا يكرمك يا رب على تشجيعك وكلماتك الجميلة اللى زى قلبك

ليه بنقفل المدونة ؟؟؟


ممكن أخمن بعض الأسباب منها


عشان اليأس بينتصر
أوعشان اللون الخروبى منتشر
أوعشان خلص الاحتياج الى الكتابة
أوعشان الملل
أوعشان وجود بديل
أو عشان اعادة الأوراق وعودة من جديد بشكل جديد
أو عشان خلص الكلام

سلام

حنين.. يقول...

... مش عارفه برده ايه الاسباب؟
لكن.......يارب تكون الاسباب خير
ودايماااا بخاف انا يجى يوم واسيب التدوين, مع انى لسه جديده فيه
وكل سنه وانتى طيبه يا قمر

همسة قلم يقول...

كل عام وانتِ الى الله اقرب وعلى طاعته ادوم ياروفي :)

نسأل الله ان يبغلنا رمضان وهو راضٍ عنا ..

اسلوبك غاية في الرقة اختى قرأت بعضا في المدونة وحقااعجبني الاسلوب ..:)

دمتِ بكل ود ودام قلمك مبدعا

rovy يقول...

موناليزا

كل عام اختى الحبيبه و انتى بخير و ان شاء الله العام القادم اسعد واحسن بكثير مما مضى يااارب ..

دائما ايضا انتى اخت حنونه و حبيبه اكرمكى الرحمن و رزقكى السعاده و نصركى دائما و دمتى لى اخت حبيبه فى الله

كل الود غاليتى
تحياتى
=================================================

محمد

رأيك مهم جدا و اعجبت به ..
اتمنى ان نكون حقا على قدر المسؤليه ..
باركك الرحمن و حفظك و رعاك
شرفت ايضا بزيارتك الكريمه

وكل عام وانت بخير ..

تقديرى و تحياتى

doctor mohamad يقول...

أم ياسمين .. إذا كانت هذه التدوينة "بلا عنوان " فسؤالك عندى بلا إجابة >إبتسامة< .. أنا أرى إن الموضوع أبسط من كدا .. فالمدونة الأن أصبحت مثل الإيميل .. لكل شخص الحق أن يمتلكها كالإيميل .. و هى متاحة وقتما يشاء كالإيميل .. ليكتب ما يشاء كالإيميل .. و أيضا يغلقها وقتما يشاء أو يلغيها كالإيميل .. أنا عن نفسى أستطيع أن أقولك ببساطة أن كل من رأيتهم تركوا التدوين بلا سبب ولا هدف .. هم من دخلوه ف البداية أصلا بلا سبب ولا هدف .. هذا ليس حكم ع الكل .. بل على البعض ..

الدرعمي يقول...

السلام عليكم

والله يا أختي الموضوع ده مر بي أنا كمان

قررت اغلق المدونة

معرفش حالة الضيق اللي حصلت لي

لأني منشغل جدا في العمل

فلقيت إني مش قادر أكمل

وحسيت إني معنديش جديد

وإني خلصت اللي عاوز أعمله

حصل لي إشباع

كان هدفي من التدوين

إني أتعرف على عقول شغالة وناس كتير

اتعرفت بالفعل على عقول وشخصيات كويسة

وبدأت أروح البورصة اللي بيتجمع فيها

معظم المدونين وبدأت اتعرف على ناس منهم

معرفش مدوناتهم أصلا

فحسيت إني أشبعت رغبتي من التدوين

وأنا اصلا مش من هواة نشر كتاباتي

لأني مش أديب ومش شايف كتاباتي

من الأهمية بما يجعلها تستحق النشر

بس هي وسيلة لفتح جسور للتواصل

مع الناس

بس هي دي كل الحكاية

لما الواحد بيحس إنه خلاص مفيش داعي

للاستمرار في التدوين

هذا والله أعلى وأعلم



آدم

عاشقة القمر يقول...

سلام عليكم عاشقة القمر من السودانمضايقات بعض المعلقين... قد يتخذ او تتخذ صاحب المدونة قرارة بالتوقف.

بالرغم من ان المدونه وسيلة هامة للتواصل مع الاخرين...

ربنا يهدينا جميعا لصالح الاعمال...و يصلح بالنا .
علي فكره في ناس اصيبو بارعب بالاسباب الاخبار في تلفز اعتقوا صاحب مدونه هكذا

ولد مصري يقول...

بقى الموضوع وما فيه ان النفر مننا بيجي عليه وقت بيبقى مش طايق نفسه ولا الكلام اللي بيكتبه يقوم مطلع غلبه فين .. في المدونة بتاعته

يكتب بوست محدش يعبره فيتنرفز أكتر

يقوم جايب عاليها واطيها ويعمل "شمشوم" وهاتك يا تكسير في المدونة الغلبانه ويقول يا أنا يا أنتي

وساعات تانيه بيبقى النفر برضه مننا بيبقى عاوز يحس انه غالي على حبايبه بتوع التدوين فيقوم قافل المدونة علشان يسمع له كلمتين حلوين من المدونين وده وبيحصل مع كل الناس

وحاجة أخيرة إنه ما بيبقاش عنده وقت وبينشغل لفترة معينه ومابيبقاش فاضي إنه يلف على مدونات الحبايب فيقوم كمان جايب ضرف مدونته ورامي المفتاح من الشباك

انا شخصيا زقزقت في دماغي الفترة اللي فاتت وفعلا كنت على وشك اني أستاذن ولولاش سمعتلي كلمتين حلوين على كام تشجيعة مكنتش باكتب اللي بكتبه ده دلوقتي

على العموم موضوع ظريف وكل عام جميع المدونين بخير وأدام علينا الله شهر رمضان بالخير وتقبل منا الصلاة والقيام

تحياتي

حـــــدوتـــــة يقول...

السلام عليكم

التدوين ده بيفرغ الطاقة اللى عندنا
واللى اتعود عليه صعب يسيبه

سلالالالالالالالالالالالالالالالالالالالالالالالالام

آخر العنقود يقول...

السلام عليكم
اولا كل عام وانتى بكل الخير اخيتى
بلغنا الله واياكى رمضان وهو راض عنا
اللهم آمين

موضوع الغياب عن المدونات
مش عارفة هقدر اقول ايه فيه
لانى انا شخصيا الترة الاخيرة مش عارفة ليه بقيت اغيب عن المدونة كتير
وبصراحة حسيت انها بترجع عندى لحالتى اللى انا فيها
يعنى لو فى حاجة شغلانى او موضوع مضايقنى او منتظراه
ببقى نفسي اوى اكتب واتكلم عنه
ولو مش قدرت انى اعمل كده بيكون النتيجة انى مش بقدر ولا اكتب ولا اتابع
ده سبب من الكتير من الاسباب اللى كل واحد بيعيشها

شكرا ليكى على اهتمامك وملاحظتك لغياب الكثير
دمتى فى حفظ الله

rovy يقول...

الربان

سيدى الربان اتمنى ا تكن بخير دئما ولا تطول غيبتك علينا ..
اشكر مرورك الكريم الذى يسعدنى دائما
كلام حضرتك مضبوط تماما و اتمنى ان نتعلم جميعاكيف نحاور دون ان نجرح ..
هدانا الله جميعا لصالح العمل ..
يارب يطمنك على اخوك الكريم و ما تتأخر علينا .. اكرمك الرحمن و حفظك
وكل عام و انت بخير
تقديرى و تحياتى

=================================================

المهاجر الى الله

اهلا بك
اسعدنى مرورك ..
ان شاءالله يديم الرحمن التواصل ..

تحياتى

==================================================

عارفه... مش عارف ليه !!!

كل سنه وانت طيب يا وليد

اعجبتنى ارائك المتعدده اخى الكريم فى هذا الموضوع ..
و اكيد كلنا ممكن نمر بمثل هذه الحالات
اما بالنسبه للغير معرف فربما معك حق و ربما لا .. لأنى ارى ان مثل هذا الغير معرف مريض و لا يجب الالتفات له او لما يكتبه لنا بغرض ان يضايقنا فلا يجب ان نحقق مراده او ان نعيره ادنى اهتمام ..
شرفتنى اخى الفاضل بمرور و كل عام وانت بخير ..
دمت بخير وسلام فى حفظ الله

تقديرى و تحياتى

الهدهد الطائر يقول...

واضح جدا ركود التدوين.
له اسباب كثيرة كما ذكر بعض المعلقين و لكني ارى سبب رئيسي لهذا الركود.
فللأسف كثيرا ما نحول الايجابيات إلى سلبيات.
فلم اسمع عن اي مجتمع يستخدم التدوين كأداة تحريضية.
قل ما تشاء و لكن لا تسئ استخدام النعمة في غير محلها.
بكل تأكيد التدوين نعمة و لها فوائد كثيرة جدا.
كيف تصور البعض ان تمر حملات التحريض السياسية بسلام؟!.. فموقع التدوين هو في دولة أخرى.. و لا يوجد وسيلة إلى التدوين إلا عن طريق شبكات الاتصال التي هي تحت سيطرة نفس الحكومات التي يتم التحريض ضدها.

الآن أصبحت كثير من الاتصالات و الاشخاص تحت المراقبة و رهن المسائلة.. و بالتالي الخوف اصبح هو الحاجز بين التدوين و زائريه.. و ذهبت الفائدة التي كان من الممكن استثمارها كحال المدونات التي تم نشرها.. أو حتى فائدة التواصل الفكري بين فئات المجتمع المترامية.

لا حول ولا قوة إلا بالله.

...تحياتي و شكري..

rovy يقول...

hany yassin

كل سنه وانت طيب وبألف خير و صحة و سلام ..
دائما تسعدنى ارائك و تعليقاتك المتميزه اخى الفاضل ..

اشكرك و اتمنى ك التوفيق دائما
دمت بخير و سلام فى رعاية الله و حفظه

خالص تقديرى و تحياتى

==============================================
gannah

اختى الحبيبه اتمنى ان تكونى دائما بخير وربنا ما يحرمنيش منك ابدا ..

كل سنه وانتى طيبه و ان شاء الرحمن تكون اجازه سعيده و نستغل كل لحظه فى رمضان قدر المستطاع للتقرب الى الله و
ربنا يقدرنا و يتقبل منا اختى الحبيبه

حتوحشينى جدا بس ان شاء الله نتقابل على خير ياااارب .. حفظك الرحمن و رعاكى ..

دمتى بكل خير و سلام وفى حفظ الله

ودى و تقديرى و تحياتى

رحــــيـل يقول...

روفى ازيك

موضوع بجد مهم قوى
تعرفى انا اوقات كتير بتيجى عليه لحظه زى دى بس مش بقدر ابدا اخد القرار
جميل جدا ان الواحد يفضفص ويحس بناس وياه رغم انهم مش يعرفوا بعض

انا اعتقد ان اللى جرب التدوين وسابه اكيد هيرجع تانى

تحياتى لكى

rovy يقول...

امل
الرقيقه الغاليه

عليكم السلام و رحمة الله و بركاته اختى الحبيبه ..

اسعدنى و شرفنى اسمك بمدونتى غاليتى ..
كلامك مضبوط كله و فعلا احنا دايما محتاجين ناس حسيتنا و حبيتنا لله من غير اى مصلحه اد ايه بيكون وجودهم فى اوقات كثير مهم وفعلا بيخلى لحياتنا طعم تانى .. ادامك الله لى و لاحبابك
و دمتى دائما بخير فى رعاية الرحمن و حفظه ..
كل عام ونتى بخير
ان شاء الرحمن انا فى اجازه ابتداء من غدا اتمنى ان اطمئن دائما عليكى ..
تقديرى و تحياتى

==============================================

ياسر

اولا كل سنه وانت طيب اخى الكريم و ربنا يحفظك و تكون بخير دايما

انا مش عاوزاك تضايق من اى ناس تافهه
بتحاول تضايق الناس و خلاص ..
المهم اننا بنلاقى الناس اللى ربنا وفقنا و جمعنا على خير معاهم و صدقنى الناس دى وجوده فى حياتنا اكيد بيفرق ممكن ما نكونش عارفين شكلهم لكن حسينا بيهم و بروحهم و نفسهم الطيبه و ده اكيد شئ غالى لازم نحافظ عليه و ما نسمحش لحدانه يضيعه منا او يخلينا نهرب من الساحه كلها و نسيبها لهم يفسدوا فيها بدون توازن او وجود للخير ..

علشان كده يا ريت تنسى الناس دى و انشاء الله هما هيزهقوا و يبعدوا ولو لا برضه كأنهم مش موجودين . . لازم تستمر و صدقنى فى غربتك انت محتاج قوى لمدونتك ولاصدقائك..
كل عام وانت بخير وان شاء الله معنا دائما ..
عاوزه اقولك انى فى اجازه من بكره ان شاء الله .. اتمنى لك كل التوفيق و اكيد حاسلم عليك فى مدونتك ..

دمت بالف خير وسلام فى حفظ الله
خالص تقديرى وتحياتى

rovy يقول...

zozo

كل سنه وانتى طيبه و بخير دائما ..
كلامك جميل و عندك حق وياريت كلنا نحس به ..

دمتى حبيبتى رقيقه و جميله و بالف خير دائما ..

اتمنى لكى التوفيق دائما

تحياتى

===========================================

princess bery

ازيك يا بيرى يا رب تكونى بخير
وعندك حق فعلا اننا بيعز علينا فراق
ناس حبيناهم .. ربنا ما يحرمنا منك يا قمر ابدا ..
كل سنه وانتى طيبه

دمتى بكل خير

تقديرى و تحياتى

rovy يقول...

بنات صاحبة الجلاله

ازيكم كلكم .. وحشتونى ..
كل سنه وانتم طيبين و يا رب دايما بخير

عندك حق اكيد فى كلامك ..
ربنا يديم بنا الصداقه و المحبه فى الله
انا بأحس ان المدونه عنوان صاحبها و مع الوقت بنحس ببعض و بتتلاقى الانفس الطيبه و تتألف .. سبحان الله ..

دمتى حبيبتى بكل خير و سلام
و لكل بنات صاحبة الجلاله كل عام وانتم بخير و صحة و سلام
ودى و تحياتى لأخواتى

================================================
nour shahen

عليكم السلام و رحمة الله و بركاته

ربنا يخليكى حبيبتى على كلامك الجميل اللى بجد اثر فيه جدا و دعيت ربنا انى اكون بأستحقه ..
ربنا يديم محبتنا فى الله و يخليكى يا نور
و يا رب يوفقك و يحميكى و دايما تكونى بخير و دايما رقيقه و محبه لاصدقائك و وفيه لهم ..
كل عام و انتى بخير و سعاده يااارب
و ان شاء الرحمن تحققى كل احلامك ..

دمتى فى حفظ الله
ودى و تحياتى

================================================

bos bos
ازيك يا بوسى يا رب تكونى بخير حبيبتى و تكونى دلوقت احسن بكثير ان شاء الله
ربنا يقويكى و يعينك و ان شاء الله اكلمك قريب و اطمن عليكى ..

تعرفى ان عندك حق فى كلامك ده بالنسبه للناس اللى بتقفل مدونتها ..
اتمنى ان لا يأتى علينا هذا اليوم
و اتمنى ايضا ان تطمنينى عليكى فى اقرب وقت خصوصا انى فى اجازه من غدا الى اخر شعبان و ساعود ان شاء الله قبل رمضان اهنئكم بالشهر الكريم و اجازه طوال شهر رمضان الكريم و نلتقى على العيد ان شاء الله تعالى ..
كل عام وانتى بخير و اطيب امنياتى لكى

تحياتى

rovy يقول...

steel beauty

اشكرك على كلامك الرقيق ..و سعدت جدا بتشريفك و تعليقك الكريم ..
كمان اشكرك على مدونتك الرائعه اللى بجد مفيده جدا للجميع .. جزاكى الله كل خير عنها ..
شرفتينى و ارجوا دوام التواصل

تقديرى و تحياتى

================================================

حاجات جوايا

و عليكم السلام و رحمة الله و بركاته
ازيك يا سالى
حبيبتى لا شكر على واجب .. الحمد لله ان المشكله اتحلت و ان شاء الله ما يحصلش اى حاجة تضايقك تانى ابدا ..
اشكر اهتمامك و تبليغك لى
كل عام وانتى بخير
دمتى بكل خير فى حفظ الله
تحياتى

==================================================

جوجو
عليكم السلام حبيبتى و رحمة الله و بركاته ..

وجهة نظرك ممكنه طبعا بس المفروض ان الواحد لو حاسس انه عاوز يبعد عن الناس اللى يعرفها بتبقى المدونه وقتها هى المنفذ الوحيد له علشان يلاقى حد يشاركه همه او حزنه ويسانده ويأخذ بأيده خصوصا لو كان كون اصدقاء يحبهم و يحبوه ..

احيكى جدا و اشكر لكى رأيك
دمتى بكل خير و كل عام وانتى بالف خير
تحياتى

rovy يقول...

المهاجر الى الله
عليكم السلام و رحمة الله و بركاته

ذكرت اكثر من سبب و كلها اسباب منطقيه جدا و احيك اخى الفاضل و لكنى اناشد كل من يضيق وقته بالمدونه و تأخذه الحياه ان يترك المدونه ربما احتاج اليها فى لحظة ما و الى اصدقاء التدوين الذين عرفهم و ليعتبر نفسه فى اجازه تدوينيه مفتوحة و على كل حال فنحن حقا نتمنى للجميع السعاده و التوفيق ..
كل عام وانت بخير
ودمت فى رعاية الله و حفظه
تحياتى

==============================================
طارق الغنام

كل سنه و انت طيب و فى احسن حال ام شاء الله .. اعاد الرحمن علينا جميعا تلك الايام المباركه بالخير و اليمن و البركات ..
اتمنى معك اخى الفاضل ان يعود جميع المدونين الذين احبناهم مرة اخرى بيننا وان لا بفقد منا احد اخر

دمت بكل خير
تحياتى

===============================================
مجداويه

اختى الحبيبه .. لا اجد كلمات تعبر عن امتنانى لكلماتك الجميله و انتى اختى من تشرف اى مدونه حقا تدخلها ..
ادامك الرحمن بكل خير بيننا و حفظكى و حفظ لكى ابنتكى الحبيبه نسمه و يا رب يفرحك بها ..
واوعى بجد تفكرى تبعدى .. مهما حصل

كل تخميناتك بالنسبه للبوست مضبوطه و صح .. و ربنا يستر و ما بخلص ابدا كلامنا فى الحق ..

دمتى بكل خير و سلام فى حفظ من لا يغفل ولا ينام ..
و كل عام وانتى بالف خير

خالص تقديرى و تحياتى

rovy يقول...

حنين

ادعوا معكى ان تكون الاسباب خير ..
و اهلا بيكى حبيبتى فى عالم التدوين و نورتيه و اوعى تفكرى تسيبى التدوين مهما حصل لأنه بجد عالم ممكن تلاقى فيه اصحاب حقيقين حبوكى لشخصك بدون اى غرض
و يا رب تكونى دايما سعيده و ربنا يوفقك ..
دمتى بخير
تحياتى

============================================

همسة قلم

اسأل الرحمن ان يتقبل دعواتك الغاليه و لكى مثلها ان شاء الله ..
جزاكى الرحمن كل الخير و اكرمك اختى الكريمه ..
اشكرك لكلماتك الجميله و تعليقك الرقيق ..
شرفنى وجودك حقا و ارجوا دوام التواصل ..
كل عام وانتى بالف خير
دمتى فى حفظ الله

تقبلى ودى و تحياتى

============================================

قوس قزح
اهلا بك ..
اكيد ان شاء الله اشارك معكم و قريبا ازور مدونتك .. ولو انى كنت اتمنى ان تشاركنى برأيك فى البوست ..
تحياتى

rovy يقول...

doctor mohamad

ما شاء الله عليك وعلى قوة ملاحظتك ..
انت الوحيد اللى اخذ باله انى لا اضع عنوان .. >ابتسامه هادئه < ....
عندك حق و الله .. فعلا انا اعلم بمثل هذه الحالات بس تأكد انهم مش بيستمروا اكيد الا مع جماعات مماثله لهم فى التفاهه
بس انا قصدت بسؤالى عن ناس حبيتهم فعلا و كان لهم اصدقاء بيحبوهم و بيستنوا كتابتهم .. ناس احساسهم عالى و حسينا احنا كمان بيهم ..
يا ريت ما حدش من الناس اللى بالشكل ده يمشى تانى ..
كل سنه وانت طيب يا دكتور
دمت بكل خير و دام لنا قلمك و تواجدك
تحياتى

=================================================

adam

اهلا بك ..
فعلا ممكن الحالة دى تيجى لناس كثير بس اتمنى انهم يعملوا زيك و ما يستعجلوش فى اتخاذ القرار .. علشان يفضلوا منورنا زيك كده ..
دمت بخير و كل عام وانت بالف خير
تحياتى

=================================================

عاشقة القمر
اهلا و سهلا بيكى حبيبتى .. نورتينى

رأيك صح اكيد.. و فعلا ربنا يستر و ان شاء الله ما حدش فينا يقفل مدونته ..
دمتى بكل خير و كل سنه وانتى طيبه

تقديرى و تحياتى

rovy يقول...

walad masry

لو على الكلمتين الحلوين نقولهم يا سيدى بس اوعى تعملها و تقفل المدونه
بجد انت من الناس اللى كان لهم تأثير و مميزين جدا و كمان كل بوستاك حلوه و متنوعه و مميزه و كثير بندخل نقرأ فيها تانى ..
لكن حقيقى انت عندك حق فى ان دى ممكن تكون اسباب واقعيه و بتحصل فعلا ..
اتمنى ان نظل جميعا متواجدين على ساحة التدوين بأمر الله الا ان يشاء الله و ان لا نفقد احد ممن لا نستطيع ان نعوضهم وانت منهم يا اخى الفاضل ..
كل عام وانت بخير
تحياتى
=================================================

حدوته

و عليكم السلام و رحمة الله و بركاته

هو ده الكلام يا اخى فعلا اللى اتعود على التدوين صعب يسيبه ..
خالص تقديرى و تحياتى

==================================================
اخر العنقود

كل عام وانتى بالف خير اختى الكريمه
و رمضان كريم علينا جميعا ان شاء الله و اللهم بلغنا اياه باذنه تعالى ..

كلامك اكيد صح .. بس اتمنى ان لا يترك احد منا التدوين ولا الناس اللى اتعودوا عليه ..

دمتى بكل خير وسلام فى رعاية الله

تقديرى و تحياتى

rovy يقول...

الهدهد الطائر

اهلا بك وكل عام وانت بخير
فعلا السبب اللى ذكرته مهم جدا
اتمنى ان نعيه جميعا ..
دمت بكل خير و اشكرك كثيرا
تحياتى

================================================

رحيل

ازيك انتى حبيبتى يا رب تكونى بخير دايما

والله عندك حق فعلا انا فيه لحظات مرت عليا حسيت ان التدوين ده هديه من الرحمن ليه .. ونعمه دعيت ربنا يديمها عليه و يديمك ليه حبيبتى و كل اصدقائى ..
دمتى فى حفظ الله و كل عام وانتى بخير

تحياتى

سارة البحر يقول...

rovy ana bgad mesh 3arfa a9olek eih
ana ba7ebek awy awy
we ba7eb kol elly radu hena fi post bta3ek
ana asfa bgad
bas homma talat asbab elly khaluny a9fel el modauana
we ana lessa bakteb fiha bas m7adesh bishofha
.....................
kol sana we enty a7la we agmal we a6yab rovy fi el donya

جنّي يقول...

السلام عليكم

لقد مررت بهذه الحالة وكنت قاب قوسين الانسحاب واعتزال التدوين .. ولكن الحمد لله عدلت عن الفكرة وعت للتدوين بعد اجازة استمرت شهرا ..

لقد جئت للاستفسار فعلا عن مدونة امل وليس امل شمس اللقاء وهي التي اخبرتني انكي تكتبين عن مدونة امل التي حذفتها .. قد تكون حذفت بطريق الخطأ فلماذا لا يكون هناك اتصال بين الأخوات لتفقدهن في مثل هذه الحالة والتأكد من حزف مدوناتهن ..

المهم شكرا لكي وجزاكي الله خيرا

جنّي يقول...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

rovy يقول...

ساره البحر

وحشتينى جدا جدا

نفسى بجد ترجعى تانى و تفتحى مدونتك اللى بجد وحشتنى يا ساره ..

كل سنه وانتى طيبه حبيبتى
سعيده قوى انى لقيتك بتتابعينا
معلش ردى عليكى اتأخر ما كنتش ناويه ادخل ابدا فى رمضان لكن لما لقيت تعليقك حاولت اكثر من مره ادخل مدونتك ..
حاستنى انك تفتحيها قريب جدا
اطيب امنياتى صغيرتى الاموره
و خالص ودى لكى

rovy يقول...

جنى

اهلا بك
سعدت بمرورك الكريم .. الحمد لله انك تجاوزت محنتك وما زلت بيننا فانا اعلم انك من الشخصيات المحترمه بين المدونين ..
اتمنى ان يدوم وجودك بيننا كمدون و ان يدوم التواصل ان شاء الرحمن ..

امل التى عنيتها هى amal و ليست امل شمس اللقاء الحبيبه .. ومع الاسف لم تحذفها بطريق الخطأ فقد تركت فى البروفيل كلمه تؤكد فيها انها حذفتها تهائيا .. على كل حال اتمنى لها كل الخير و السعاده و ان يوفقها الرحمن .. و يوفقنا جميعا ..

كل عام وانت بالف خير

تحياتى