الأحد، 5 أكتوبر، 2008

اليوم الاول لمريم فى الكى جى وان ..

اولا عاوزه اشكر اختى الحبيبه جنه لأنها طلبت منى انى اعمل بوست لمريم فى اول يوم لها بالمدرسه و اوصف احساسى و تصرفها ..
فى الصوره الاولى كانت لسه قلقانه شويه و ده الزى بتاعها كامل و اللى فى ايديها ده اللانش بوكس الصغير و اللى رجع تانى معاها ..
مريم هنا بدأت تتأقلم و تفرح لأنها رايحه المدرسه و حيكون عندها اصحاب كثير .. لبست و استعدت ما شاء الله عليها ..و كمان علقت الشنطه ..


ده طبعا كوب اللبن اللى عملت لها اراجوز علشان تشربه و برضه لم يشرب غير الشويه اللى شربتهم لزوم الصوره .. بالهنا و الشفا .. دى اول خطوه لها بالمدرسه اللهم باركها و احفظها و احرصها هى و كل اولادنا و بناتنا يااارب ..
هنا لما رجعت بالف سلامه و لله كل الحمد و الشكر و طبعا كانت فرحانه و سعيده لان اول يوم كله لعب فى لعب و كمان لانهم شخبطوا لها وشها زى ما انتم شايفين .. المهم انها رجعت و الحمد لله اصلها بجد وحشتنى قوى جدا خالص ..
***************************************

عاوزه اقول لجنه ان الفكره عجبتنى جدا و دايما افكار جنه بتعجبنى بجد ربنا ما يحرمنيش منها ابدا قولوا ان شاء الله .. و ده كان اول يوم لمريومه من اول ما صحت الصبح الى ان عادت ان شاء الرحمن بالسلامه لحضنى و للبيت ..


اما عن احساسى حقيقى بجد انا عارفه ان ده احساس كل ام طفلها بيروح اول يوم المدرسه بيكون احساس يشبه احساسها اول يوم فطام له .. بجد و الله حاسه بنفس احساسى لما فطمتها و انا باحن لها و كأن انا اللى محتاجه لأنها تفضل فى حضنى و يومها صممت انها تفضل نايمه فى حضنى و كأنى بأكد انها لسه طفلتى الحبوبه .. نفس الاحساس الغريب ده حسيته و انا مش فاهمه اذا كان خوف من عدم تحملى بعدها بعد ما اتعودت انها ما تفارقنى و لا ارتياحى لانها كبرت والحمد لله و انى اقدر اعود لممارسه حاجات كثير .. اقلها تحركى بحريه فى فترة وجودها بالمدرسه ..

المهم انه احساس متلغبط ما بين الخوف و الفرح و القلق و الارتياح .. فعلا هو احساس صعب اوصفه بس بيتهيألى وصل لكم ....

اما مريومه فكان يومها الاول طبعا كله لعب و احتفال و بونبون و شيكولاته .. و وحشتنى جدا و الحمد لله رجعت لى بالسلامه مبسوطه و فرحانه يارب دايما و الحمد لله سبحانه و تعالى كل الحمد ..

استحلفكم بأنكم تدعولها ربنا يحفظها ويبارك لى فيها و فى اخواتها ياارب .. و يبارك لكم كلكم فى اولادكم و يرزق اللى لسه ما عندوش اولاد ياااارب ..


اتمنى ان الفكره تكون عجبتكم و انى ما اكون ثقلت عليكم .. و كل عام و انتم بالف خير


هناك 73 تعليقًا:

مدينه الملائكه يقول...

هيييييييييييييييييييييييييه
اول تعليق في حياتي عندك يا ماما روفي
ومش في اي بوست ده بوست لمريومه القمر
ما شاء الله عليها بجد الله اكبر ربنا يحميها هي واخواتها ويخليوهملك يا رب
عسوله في الزي المدرسي يا ناس الله اكبر
بس يا رب تحب المدرسه كدا علي طول اساليني انا هههههههههههههه
ربنا يحفطهالك هي واخواتها ويخليكي ليهم يا رب
تحياتي ومودتي
مي

bar2ash يقول...

السلام عليكم

ازيك يا ام مريم

تعرفي بنتك ماشاء الله امورة اوي

ربنا يحفظها ويسعدها ويخليكي ليها ويخليها ليكي

وتفضلي كده لحد ما تشوفيها احلي عروسة وكمان تشوفي اولادها وتجوزيهم


كل سنة ومريوما طيبة ويارب يكتبلها التوفيق في كل خطوة



واعطي لمريم بوسة بالنيابة عني
قوليلها من عمو برقش
متنسيش لو نسيتي هزعل وابقي قوليلي بوستيهالي ولا لا

تحياتي الخالصة

برقش

zOzO يقول...

ازيك يا احلي روفي
مريم بسم الله ماشاء الله
ربنا يبارك فيها يارب ويحفظها
ويارب تكوني معاها ف كل مرحله وتوديها

تحياتي

mohra يقول...

كل سنه و انتى طيبه يا روفى
مريومه جميله قوى و ضحكتها حلوه ما شاء الله
ربنا يخليهالك
المشاعر اللى بتوصفيها مشاعر جميله و طبيعيه جدا و يا ريت تبقى تحكى اكتر
انا بادعيلها زى ما قلتى

نهر الحب يقول...

مبروك
ربنا يخليها لك يارب
ماشاء الله تبارك الله
بس تفتكرى هتحب المدرسة ؟؟

Gannah يقول...

بسم الله ما شاء الله والله قمر
بس الصورة الاولى يا عينى متاخده قوى
عجبانى الشنطة واللانش بوكس النونو بتاعها..بتحطوا فيه ايه؟؟ أكل عصافير
بس يا روفى أنا كنت فاكرة بقى هلاقى فيونكات وضفاير وكده ..
بس حلوة والله فى كل أحوالها
طبعا أنا مقدرة شعورك جدااا ربنا ما يبعدكوش عن بعض أبداا بس زى ما أنت قلتى فرصة ليها تتفطم من حضن ماما ولو لكام ساعة وفرصة ليكى يكون فيه وقت تقدرى تعملى شغلك فى هدوء
قوليلها طنط جنة بعتالك مليون بوسة ونفسها تروح معاكى الكى جى..ينفع؟؟
وربنا يباركلك فيها ويحميها
ومش عارفة اقولك ايه على اللى انت كتاباه عنى...وش مكسوف
بس اكيد كل الناس عارفة ان ده شعورى انا كمان بالنسبة لك
ربنا يخليكى ليى
تحياتى

رحــــيـل يقول...

ربنا يخليهالك يارب ويفظها
بسم الله مشاء الله زى العسل

Esraa Hamed يقول...

كل سنة و انتي طيبة يا روفي
و كل سنة و مريومة اجمل بنوتة في الدنيا
بجد ما شاء الله عليها يارب يخليهالك و يباركلك فيها

تحياتي ليكي يا قمرة
و في انتظار جديدك ان شاء الله

rovy يقول...

مدينة الملائكه
ما شاء الله عليكى انتى و على طيبتك حبيبتى رنا يكرمك و يحقق احلامك و يفرحنى بيكى ..

متشكره على دعواتك الجميله و لكى مثلها و يااارب يتقبل ..

دمتى بكل ود و حب و خير و سعاده

تحياتى
================================================
bar2ash

ازيك يا برقش .. انا الحمدلله بخير و يارب تكون انت بالف خير ..
الله يخليك على كلامك و دعواتك الجميله و يا رب يتقبل و يجازيك كل خير ..

مريم بتشكرك و بجد وصلت لها سلامك و الامانه و هى بتقولك مرسى يا عمو

كل الشكر و التقدير

تحياتى
============================================
zozo
ازيك يا احلى و اجمل و ارق زوزو
يارب تكونى بالف خير ..
شكرا حبيبتى على كلامك الجميل ربنا يكرمك و يحفظك و يطمنى عليكى دايما

ودى و تقديرى

==============================================
mohra
و انتى طيبه يا احلى مهره
الف شكر حبيبتى على كلامك الجميل اللى زيك و زى قلبك الجميل ..
يااارب يتقبل دعوتك و يجازيكى كل الخير

دمتى فى رعاية الرحمن و حفظه
ودى و تحياتى

================================================

rovy يقول...

نهر الحب

الله يكرمك و يحفظك و يرزقك سعادة الدارين اختى الحبيبه ..

اما عن سؤالك و الله انا و باباها كنا لسه بتسأل نفس سؤالك ..
ربنا يستر ادعى لها و لكل الجيل و مين عارف يااارب تحصل المعجزه و الجاى يكون احسن من اللى فات و تنصلح الاحوال ..

دمتى بكل خير غاليتى
ودى و تقديرى

==========================================
gannah
الله يخليكى و يارب يفرحنى بيكى و يرزقك بالزوج الصالح و الذريه الصالحه ..
اللانش بوكس او الساندويتش بوكس ده وحياتك رجعت لى بالساندويتشات اللى فيه و قالت لى اكلتلك منهم واحد بحاله
اما عن الفيونكات فمريم لا تتحمل اى حاجه فى شعرها اكثر من خمس دقائق ..
مريم عارفه اد ايه بتحبيها بس حاضر حاوصل لها كلامك و المليون بوسه فى بوسه
و طبعا حتقولك ياريت تيجى معايا ..
ربنا يخليكى و ما يحرمنيش منك و صدقينى مهما قلت عنك مش حوفيكى حقك ..
ربنا يرزقك كل السعاده و يجازيكى كل الخير ..
ودى و تقديرى و خالص تحياتى

احبك فى الله
===============================================
رحيل

الله يخليكى يا رحيل و يجازيكى كل خير و يرزقك كل سعاده يااارب ..
ودى و تقديرى
تحياتى

===========================================
esraa hamed

و انتى طيبه يا اسراء .. ربنا يخليكى حبيبتى و يبارك فيكى و يرزقك كل السعاده فى الدارين ..

خالص تقديرى و امتنانى
دمتى فى حفظ الله

تحياتى

الجواز و سنينه يقول...

اولا ربنا يحفظهالك من كل شر
و ثانيا انا عارفه الاحساس ده رغم ان بناتى لسه ما وصلوش للمدرسه بس مره خرجوا مع باباهم و كنت فاكره انى هاقعد فى هدوء
بس و الله اد ايه اشتاقتلهم و فعلا احنا اللى محتاجنهم اكتر
تحياتى و بوست اكتر من رائع

بنات صاحبة الجلالة يقول...

اية الجمال دا كله مشاء الله عليها

شوفتي القمر مريم مرات ابني نستني اقولك ازيك ياروفي وحشتني يابنتي عاملة اية واخبارك اية ربنا يحميها يارب من كل شر وجميلة اوي في الزي بتاعها والشنطة كمان حلوة خالص ممكن استلفها منها هههههههههه

هتبدا رحلة المدرسة ربنا يقويها ويعينها يارب ومترجعش بالسندوتشات ويكون لها اصحاب كتير باذن الله واشوفها عروسة زي القمر يارب

خالص تحياتي وقبلاتي لمريومة

rara يقول...

روفى
وحشتينى اوووووووووووى
وكل سنه وانتى طيبه
وربنا يخليلك مريومة
ويخليكى لها
ويكرمك دايما يارب

Walad_Masry يقول...

ما شاء الله

ايه الجمال ده

عقبال ما تشوفيها كده وهي رايحة كلية الطب والمرة دي إنتي هتوصليها ودكتورة جنة هتبقى مستنياها على باب الكلية (يلا ابسطي هيبقى عندك واسطة)

ربنا ما يحرمكمش من بعض إنتي ومريم وجنة

تحياتي

nour shahen يقول...

البنوته ما شاء الله عليها زي السكر
بالتأكيد زي مامتها حبيبتنا ويمكن اكتر كمان ههههههههههه
ضحكتها لذيذه خالص بجد الاطفال دول سبحان الله ضحكتهم ترغم الواحد انه لازم علي الاقل يبتسم زيهم بفرحه من القلب

ربنا يباركلك فيها وفي كل اولادك يا رب وفي كل اولاد المسلمين ويرزق الجميع بالخلف الصالح

وكتبتى كلمات مش من مدونه لا من قلب أم عامر بالحب والحنيه
وربنا يباركلنا فيكى وفى قلبك ويسعدك دايما يا رب وتشوفى مريومه كبيره وتشيلى اولاد اولادها يا رب

خالص حبى واحترامى

ahmed_k يقول...

يا رب يحرسها ويخليها مبسوطه كده دايما
طبعا مقد إحساسك وإحساس كل ام
في أول يوم دراسه لأبنها أو بنتها
بس دي سنة الحياه
وعقبال متفرحي بيها
وهي لابسه فستان فرحها يا رب

شدي حيلك يا مريوم وبلاش شقاوه
وخليكي شاطره
وإن شاء الله تفرحي ماما وبابا وتبقى
دكتوره آاااااااد الدنيا

سلااااااااااام

موناليزا يقول...

ياحبيبتى ربنا يحفظها ويباركلك فيها هى واخواتها وعقبال ماتشوفيها عروسة فى الكوشة يارب
بجد فكرة جميلة وده مش بعيد على جنة طبعا فهى صاحبة اجمل الكلمات وارق الاحاسيس
أدامدكم الله لى اخوات احبهم فى الله
بس سيبك انتى مريومة ماشاء الله ذى القمر ويارب تفضل تحب الحضانة والتعليم على طول
واذا كان على اللبن صوريها كل يوم وهى بتشربه طالما مش بترضى تشربه غير عشان الصورة
وربنا يحميكى ويحمى بناتك ويخليكى ليهم يارب
ودمتى لهم دائما أُماً حانية وقلبا عطوفا

TeVa يقول...

ههههههههههه

فكرتينا بالذي مضى

ههههههههه

ربنا يباركلكم فيها ويوفقها دايما يارب :)

ياسر يقول...

الله عليكي يامريومة
عقبال الكلية انشاءالله يارب
وفكرة ممتازة من جنة
ربنا يباركلك فيها يا ام مريم هيا واخواتها
ويعينكوا ويقويكم ربنا علي توصليهم لاعلي
درجات التعليم اللهم امين يارب العالمين
فائق احترامي وتقديري
واطيب امنياتي لمريومة بالتوفيق
والنجاح يارب

خالوا عادل

جوجو يقول...

السلام عليكم

ازيك ياروفى

بصراحة الفكرة جميلة جدااااااااا

بنتك زى القمر ما شاء الله اكيد طبعا

طالعة لمامتها

ربنا يجعلها قرة عينك ويوفقها ان شاء الله فى الدراسة

تحياتى

جنّي يقول...

بارك الله لكي فيها وأنبتها نباتا حسنا ..

وأقر الله بها عين والديها

وحفظها الله من شر خلقه ومن الشيطان وشركه

شكرا

دنيتى الجميله يقول...

كل سنه وانتى طيبه
وربنا يحفظ سهيله ومريم وجميع ولاد المسلمين
يحفظهم ويرعاهم ويهديهم
"استودعناهم ربنا"

الازهرى يقول...

صديقتى العزيزة

اولا الفكرة جميلة بالفعل

وربنا يخليهالك وتحتفلى بتخرجا ان شاء الله

وبالمناسبة قالوا للحقيقة وجهان فاذا اردت ان تعرفى وجه كى جى 1 الاخر فزورى المدونة
http://www.blogger.com/profile/11637012522079510463

والخاصة princess


وكلام فى بينا بعيدا عن الاخرين
هل تلك الساحرة مخطوبة ام اننى جئت فى الوقت المناسب ؟
ارجوا سرعة الاجابة قبل ان يسبقتنى الاخرون

تحياتى لك ولها وليس لجنه

الربان يقول...

تحياتي

- - اشكرك كل الشكر علي مواساتك الكريمة ...لا اراكم الله مكروها في عزيز لديكم

- بالنسبة لمريم ، من احب الاسماء الي نفسي ، ربنا يبارك فيها ماشاء الله مبتسمة...و ربنا يفرحكم بها...و عقبال
الجامعة ان شاء الله.

ربنا يحفظها من كل سوء و يباعد عنا اهل السوء...و يتقبلها بقبول حسن
و ييسر لها امرها...و يبارك لها في
اهلها...اللهم امين.


تحياتي و تقديري

امل يقول...

السلام عليكم
ماشاااء الله عسولة قوي مريومه ربنا يحرسها يارب ويحفظها من كل سوء ويبارك لك فيها وتشوفيها من اسعد الناس

Miss. Sosa يقول...

ماشاء الله عسولة اوي مريومة وشكلها بنوتة هادية ولذيذة زي مامتها روفي العسولة

ربنا يبارك لك فيها يارب ويحفظها ويصونها وتشوفيها زي ماتتمنيها واحسن ان شاء الله

وبجد كنت مفتقدة طلتك الرقيقة في مدونتي (ارض الكفاح :D )

تحياتي

حزينه يقول...

بس الله ما شاء الله
ربنا يخليهالك
ما اجمل براءتها



حزينه

غير معرف يقول...

بسم اله ما شاء الله ربنا يحميها و يخليها يااارب ..

salwa

rovy يقول...

الجواز وسنينه

الله يكرمك ياارب اختى الفاضله و يخلى لك بناتك يااارب و يبارك فيهم و يخليكى لهم و يفرحك بهم و يجعلهم قرة عينك ..
اسعدتنى زيارتك الكريمه و اسعدنى التعرف عليكى و على مدونتك الجميله

ادام الله تواصلنا ان شاء الله

تحياتى

rovy يقول...

بنات صاحبة الجلاله

الله يخليكى يا حماة بنتى يااارب و ما يحرمنى منك ابدا ..

انتم كمان وحشتووووووونى كثير جدا

الله يخليكى و باشكرك على دعواتك الغاليه يا رب يتقبل و لكى مثلها ان شاء الله ..

دمتم ثلاثتكم بكل خير و سعاده ياااااارب ..
تحياتى

rovy يقول...

rara

انتى كمان وحشتيننننى كثيييييييير

و انتى طيبه حبيبتى و ربنا يكرمك و يبارك فيكى ..

اشكر لكى دعواتك الاغاليه يا رب يتقبلها و لكى مثلها اختى الحبيبه

تحياتى

rovy يقول...

walad_masry

ربنا يخليك يارب
اشكرك اخى الفاضل على كلماتك الرقيقه و دعواتك الغاليه و يا رب يتقبل و لك مثلها ان شاء الله و جزاك الله كل الخير ..

و باشكرك كمان على دعوتك ان ربنا ما يحرمناش من بعض انا و جنه .. بجد جنه انسانه جميله قوى و حاسه انها هديه من ربنا و نعمه يا رب يديمها ليه ..

و يديم تواصلنا معك ايضا اخى الكريم كاخوه فى الله .. اكرمك الرحمن ..

خالص تقديرى و امتنانى

تحياتى

rovy يقول...

nour shahen

ربنا يكرمك يا نور و لا يحرمنى من طلتك الرقيقه ياارب ..

اشكرك جدا لكلماتك الرقيقه
و لدعواتك الغاليه

يارب يتقبل و لكى مثلها و جزاكى الله كل الخير و رزقكى سعادة الدارين .

ودى و تحياتى

!!! عارفة ... مش عارف ليه يقول...

ربنا يحفظها من كل مكروه
ويوفقها دايماً
ويعنها على كل ما هو أت

وربنا يطمنك يا روفي عليها وجمدي قلبك شوية بكرة إن شاء الله عودها يشتد وتبقى صلبه وتقدر تواجه الدنيا كلها بإذن الله

وبالمناسبة دي كان في بوست اسمه "شنطة المدرسة"
http://3arfah.blogspot.com/2008/05/blog-post.html

مش عارف شوفتيه قبل كده ولا لأ .. هو قديم شوية بس كلامك فكرني بيه وبإحساسي وأنا باكتبه


ربنا يحفظها لك من كل مكروه
اللهم أمين

نيرة و منةالله يقول...

الله
عسولة خالص
هما كل الاطفال كدة والا ايه
محدش بيشرب اللبن
واللهى بنعمل ارجوز ومبيتشربش بردو
عموما ربنا يجعل كل ايامها سعيدة
:):)

كيكى يقول...

انا من يومين كتبت تعليق بس النت فصل ورجع يا ترى وصل
؟؟
يلا ماعلينا
المهم
ان مريوووووووووومة حبيبتى ماشاء الله عليها بجد
الله اكبر الله اكبر
عسولة اووووووووووووى اخر صورة ليها ضحكتها الله اكبر بجد
ربنا يحميها ويحفظها الهم ما امين
يا حبيبتى
ياترى هى عاملة اية النهاردة وراحت المدرسة تانى يوم ولا لااااااااااا
طب خفت ولا اية
وانتى عملتى اية روفى بجد
طمنينى انا قلقانة اوى والله طمنينى فى اقرب فرصة
دومتى فى احسن حال
بجد كان ليكى وحشششششششششششششة
كبيرررررررررررررررررررررة
اوووووووووووووووووووووووى
اموااااااااااااااااااااااااااااة
عووووووووووووووووووووووووووووووو

كيكى يقول...

اية دة مفيش حفظ على التعليقات
يبقى شكلوا موصلش
امممممممممممممممممممممم
روفى ارجوكى طمنينى فى اقرب فرصة
عوووووووووووووووووووووووووو

همس يقول...

ايه البنوتة العسوله دى

بتفكرنى بنفسى زمان

شبهى وانا صغيره

ههههههههههههههه

ما شاء الله عليها

ربنا يبارك فيها ويحفظهالك وتشوفيها عروسه كمان

وشكرا لجنه علشان شجعتك تنزلى البوست

وعجبنى اوى انك اصريتى تنام فى حضنك

بجد موقف حلو اوى

من الاخر ادتيها جرعه حنان مكثفه جداااااااا


وربنا يبارك

PrInCeSS BeRy يقول...

روفىىىىىىىىىىى ازيك يا حببيى وحشتينى يارب تكونى كويسة ويخليهالك يارب ويسعدك بيها وتكون احلى بنوتة فى الدنيا بحبك كتير

Gannah يقول...

وحشانى جدااااااااااااااااااا
بس

rovy يقول...

ahmed_k

الله يكرمك اخى الكريم و يتقبل دعواتك الغاليه و يجازيك عنها كل الخير يااارب

اشكر كلماتك الطيبه و ادعو الرحمن ان يرزقك سعادة الدارين ..

تقديرى و تحياتى

==============================================

موناليزا

اختى الحبيبه وحشااااانى جدا

الله يخليكى يارب و يبارك فيكى و يرزقك كل السعاده و يارب قريب جدا الاقى بوستك و بوست لجنه كمان عن اولادكم ياااارب ..

ادعوا الله ان يتقبل دعواتك الغاليه وان يجازيكى عنها كل الخير ياارب ..
وان يديم بيننا انا و انتى و جنه كل الموده و الحب فى الله و لا يحرمنى منكم ابدا يااارب ..
احبك فى الله و هو اعلم بما هدانى اليه فى حبك و حب جنه فسبحان الله الذى جمعنا
ادعوه برحمته ان لا يفرقنا ابدا ..

خالص ودى و تقديرى

===========================================

ghoneem يقول...

السلام عليكم

أخبار حضرتك ايه يارب بخير وصحة وسعادة انت وكل أحبابك

ربنا يبارك ليكي ف مريم واخواتها يارب ويبارك في ذرياتهم وأزواجهم امين

بنوتة زي العسل ماشاء الله والفكرة جميلة جدا جدا جدا وطريقة لذيذة أوي انك تعملي أول يوم ليها ف الكي جي بالطريقة دي
أكيد هنغش الفكرة دي منك ان شاء الله

حبيت أشكرك جدا علي دوام زياراتك وتعليقاتك الجميلة ونصائحك الغالية اللي أفدتيني بيها جدا جدا

تحياتي وخالص دعائي

بالتوفيق.................

rovy يقول...

teva

اهلا بك

اسعدتنى زيارتك الكريمه و دعوتك الغاليه ادعوا الله ان يتقبلها و ان يجازيك كل الخير ..

تحياتى

================================================
ياسر

اخى الفاضل ياسر دائما يسعدنى تعليقك .. اكرمك الله و جزاك كل الخير

اشكرك على دعواتك الجميله و الغاليه و يارب يتقبلها و يجازيك عنها كل الخير

ويا رب عقبال ما اشوف بوست لبنوته حلوه ليك او ابن زى القمر قريب ان شاء الله عندما يمن عليك الرحمن بالزوجه الصالحة قريبا جدا يااارب ..

فائق امتنانى و تقديرى

تحياتى

=================================================

جوجو


و عليكم السلام جوجو الحبيبه

ربنا يخليكى حبيبتى كلامك هو اللى جميل زيك يا قمر و يا رب يكرمك و يرزقك سعادة الدارين ..

دمتى فى حفظ الله

تقديرى و تحياتى

rovy يقول...

جنى

بارك الله فيك اخى الفاضل و بارك لك فى كل احبابك واكرمك و اسعدك سعادة الدارين ..

كل الشكر و التقدير لتعليقك الكريم و دعواتك الغاليه ..

جزاك الرحمن كل خير

خالص تحياتى
=======================================================

دنيتى الجميله

و انتى طيبه اختى الكريمه
و يا رب يحفظ لك سهيله و حلو بجد اسمها
ما شاء الله ربنا يحفظها و يبارك فيها و فى كل بنات و اولاد المسلمين ياارب

كل الشكر لتعليقك و دعواتك
جزاكى الله خيرا
تحياتى

===================================================

الازهرى

اخى الفاضل

الحمد لله ان الفكره عجبتكم و باشكرك جدا لكلماتك الطيبه و دعواتك الغاليه يا رب يتقبلها و يجازيك عنها كل الخير ياارب
ان شاء الله سأرى الوجه الاخر لكى جى فى مدونة برنسيس و كل الشكر للافاده

اما عن مريومه فقد سبقتك اليها احدى فتيات بنات صاحبة الجلاله و خطبتها لابنها و لكن سيبقى القرار لمريم و الله الموفق .. (((...

اشكرك و اتسأل لماذا تحيتك ليس لجنه (اختى الحبيبه) .. على كل حال اكيد ده هزار لان جنه محبوبه من الجميع و انا اعلم انك من قراء مدونتها اليس كذلك ؟؟

خالص الشكر و التقدير

تحياتى

rovy يقول...

الربان

اسعدتنى زيارتك كثيرا اخى الفاضل لانها طمئنتنا على احوالك و كم دعوت الرحمن ان يكون معك و يلهمك الصبر لفقدان شقبقك رحمه الله و اسكنه فسيح جناته ..

كل الشكر لكلماتك الطيبه بتعليقك الكريم و دعواتك الغاليه التى ارجواللهان يتقبلها و ان يجازيك كل الخير و ان يبارك لك فى اهلك و ان لا يريك مكروه فى حبيب اخر يااارب ..

دمت بكل خير فى حفظ الله

خالص تقديرى و تحياتى

================================================
امل

امل اختى الحبيبه وحشااانى بجد ....
ربنا يكرمك و تكونى دايما بكل خير
اشكرك حبيبتى لدعواتك الغاليه يارب يتقبلها و يجازيكى عنها كل الخير ياارب

دمتى حبيبتى بكل خير و فى رعاية الله

تقديرى و تحياتى

==============================================

miss. sosa

انتى كمان وحشانى جدا ووحشانى طلتك الرقيقه المتميزه .. معلش رمضان و من قابله باسبوعين وانا فى اجازه .. ان شاء الله يدوم تواصلنا اختى الحبيبه ..
مدونتك من المدونات اللى باحبها جدا بجد ربنا يبارك فيكى و ما يحرمنا منك ..
اشكرك لكلماتك الطيبه و دعواتك الغاليه لمريومه يارب يتقبلها منكى و يجازيكى عنها كل خير ياارب ..

خالص ودى و امتنانى

تقديرى و تحياتى

rovy يقول...

حزينه

الله يخليكى حبيبتى و باشكرك جدا لمرورك الذى اسعدنى و اتمنى بجد ان اراكى قريبا جدا سعيده و ليست حزينه ابدا ..

تحياتى

===============================================

اختى الحبيبه سلوى

شكرا ليكى يا قمر و يا رب يبارك لك فى اولادك ياارب ..

ودى و تحياتى

rovy يقول...

عارفه... مش عارف ليه!!!

اشكرك كثيرا اخى الفاضل على كلماتك الجميله و دعواتك الغاليه اتمنى ان يتقبلها الرحمن و ان يجازيك عنها كل الخير يااارب ..
لا اعتقد انى رأيت بوست " شنطة مدرسه"
و لكنى ان شاء الله ساراه لانك شوقتنى لقرأته جدا ..

خالص تقديرى و امتنانى

تحياتى

============================================

نيرة ومنة الله

اسعدتنى زيارتكم جدا و تعليقكم الكريم
و اتمنى ان ارى اول بوست لكم قريبا ..

شكرا على دعوتكم الغاليه و يارب يجازيكم كل خير ..
دمتم بكل خير و دام التواصل ان شاء الله
تحياتى

=================================================

كيكى

حبيبتى كيكى
ربنا يخليكى لاهتمامك وسؤالك اختى الحبيبه الغاليه جدا بجد ..
الحقيقه مريم كانت تعبانه بجد و رحت بها لدكتور عصام جوده و ده يعتبر من اكبر دكاتره الامراض الصدريه عندنا لأنى قلقت الحساسيه ترجع لها بازمه جامده و مع ذلك بعد ما رجعت من عند الدكتور اضطريت انزل الفجر علشان اديها جلسة تنفس واضح انها كانت ازمه جامده جدا .. بس الحمد لله عدت على خير هى دلوقت احسن بس لسه فى اجازه من المدرسه و بالنسبه للمدرسه انا رحت تانى يوم ما كلمتك وقابلت المدير و المشرفه المسؤله عنها و هما كانوا متفهمين جدا و الحمد لله ..

ربنا ما يحرمنى منك
وعلى فكره انا كنت كتبت لك كل ده اوف لاين بس واضح انه ما وصلش ..

دمتى لى اخت و صديقه حبيبه

ودى و تحياتى

rovy يقول...

همس

اشكرك اختى الحبيبه

كلماتك طيبه و دعواتك غاليه اللهم تقبلها و جزاكى عنها ان شاء الله كل خير ..

انا كمان باشكر جنه و مش كفايه انى اشكرها بجد وجودها فى حياتى فرق كثير ربنا ما يحرمنى منها ابدا يارب و لا منكم جميعا.. ان شاء الله

دمتى بكل خير

تحياتى

==========================================

princess bery

احلى بيرى وحشاااانى جدا

الله يخليكى و يكرمك و يرزقك كل السعاده يااارب يا بيرى ..

ودى و تقديرى

تحياتى

============================================

gannah

وحشاااااااااااانى اكثرررررررررررر
جدااااااااااااا
ربنا ما يحرمنى منك .... لو قرأتى ردى على تعليق كيكى حتعرفى ان كان غصب عنى انى مش قادره اضبط وقتى واعرف اكلمك ..

اجمل و احلى تحية

rovy يقول...

ghoneem


انا الحمد لله اخى الفاضل

يا رب انت تكون بالف خير و دايما نطمئن عليك ..

اشكرك جدا على دعواتك الغاليه و يارب يتقبلها و يجازيك كل خير يااارب

سعيده بتعليقك جدا و سعيده لان الفكره عجبتك و يا رب تغشها قريب جدا ..
ربنا يكرمك و يرزقك سعادة الدارين

عاوزه اؤكد لك انى زيارتى لمدونتك بتسعدنى دايما و اشكرك لكل هذه الكلمات الرقيقه و طيبه مثلك ..

خالص تقديرى و تحياتى

عاشقة القمر يقول...

مشاءالله ربنا يحفظ منكل شر وخيلها لكي
يارب تشوفي عروس

rovy يقول...

عاشقة لقمر

اكرمكى الله اختى الكريمه و يارب يتقبل دعوتك الغاليه و يجازيكى عنها خيرا ..

خالص امتنانى و تقديرى


تحياتى

.-_أمير الهدوء_-. يقول...

ربنا يحفظها يارب بجد سكرررررررررر
ما شاء الله

:)

rovy يقول...

امير الهدؤ

حفظك الرحمن و اكرمك

كل الشكر و الامتنان لمرورك الكريم و دعوتك الغاليه ..

تحياتى

سمكه وحده يقول...

اولا اذيك يا روفي ياقمر
ثانيا ربنا يبركلك في بنوتك يارب ماشاء الله عليها ربنا يحفضها من كل شر والف مبروك ياستي علي دخول المدرسه وانتي بقي هي وحشاكي لانها رايحه المدرسه امال بقي لما تيجي ان شاء الله تتجوز وتشوفيها وهي عروسه هتعملي ايه بقي يارب تكبر وتبقي عروسه اموره وتحقق كل احلامها ويخليهالك هي واخوتها ويسعدهم لك يارب
شوفتي بقي دعاوي كتير اهه هتاني بقي حق المواصلات ده انا دخت علي ما عرفت عنوان المدونه ورنت الجرس كتير
تحياتي
سمكه

شيماء سمير يقول...

الله
ربنا يبارك لك

سامحى تقصيرى
بجد
الدراسة
وبكالريوس
والخطبة

دعواتك

بحب حنيتك

مجداوية يقول...

السلام عليكم
الله
مريومه زى العسل
فكرتنى بالظبط بنسمة ورجعتينى لورا اتناااااااااااااااشر سنة
أنا صورت نسمة برضه بس بالفيديو ولما بنعوز نضحك أنا وهى بنشغل الفيلم ده ان شاء الله لما مريم تكبر وتشوف التدوينة دى حتضحك معاكى والفرحة حتبقى كبيرة جدا فعلا فكرة هايلة
أضحك على نسمة فى الفيديو كانت فى حضانة راهبات قبل ما أنقلها مدرسة لغات عادية والميس بتاعتها كانت اسمها إلين فأنا بأسال نسمة اسم الميس بتاعتك ايه يا نوننس قالت اسمها إلينج
بتعطيش الجيم

وطبعا كل ما نسمع طريقة نطقها نموت من الضحك
ذكريات جميلة وسن براءة وعفوية
ربنا يبارك لك فى مريم وتصوريها أول يوم فى الجامعة وبعديها صورة الزفاف وبعديها أول مولود وهلم جرجرررر
سلامى لها وباركى لها ,,مجبتهاش عندى فى المدرسة ليه !!!!

rovy يقول...

سمكه واحده

اهلا ..اهلا بكى نورتينى يا احلى سمكه

الله يبارك فيكى و يكرمك

اشكرك لدعواتك الغاليه و ادعوا الرحمن ان يتقبلها و ان يجازيكى عنها كل الخير ياارب ..

و بالنسبه للتاكسى انا حاسبته و اتفقت معاه ان الحساب عندى يعنى المشوار مش حيكلفك حاجه بس انتى نورينا يا قمر ..

حقيقى اسعدتنى زيارتك واتمنى دوامها

دمتى بكل خير

تحياتى

rovy يقول...

شيماء سمير


الله يخليكى حبيبتى و يكرمك بجد انا عذراكى و الف مبرووك مره اخرى الخطوبه و ربنا يتمم بخير ياارب

لكن برضه بتوحشينى .. المهم انى اطمن عليكى .. ولا يهمك ..

الله يعينك و يوفقك يارب

دمتى بكل خير غاليتى

تحياتى

rovy يقول...

مجداويه


اختى الحبيبه .. الله يخليكى و يكرمك و يبارك لك فى نسمه يااارب و تشوفيها احلى عروسه فى الدنيا و يخليكى لها .

اشكرك لدعواتك الغاليه ادعوا الله ان يتقبلها و لكى مثلها ان شاءالله و ان يجازيكى كل الخير ..

جميله دايما الذكريات الحلوه يارب يجعل كل ايامك و ايام نسمتنا الحلوه سعاده
و هناء يارب و يبارك لك في نسمه و يحفظها هى و بناتى و بنات واولاد المسلمين جميعا من كل شر ..

كان نفسى طبعا مريم تكون عندك بس انا معرفش انك مدرسه غير دلوقت .. بس ملحوقه نحولها فورا و تبقى مع خالتها
...........

حقيقى اسعدنى تعليقك الكريم و دعواتك الغاليه ..
ادامك الرحمن صديقه و اخت و حبيبه فى الله ..

خالص تقديرى و تحياتى

غير معرف يقول...

ما شاء الله حبيبتى عليها ربنا يحميها ياارب و يبارك فيها و فى اخوتها ..

بجد زى القمر

فرحت قوى انى شفت التدوينه دى و شفت صورها الحلوه دى ..

حنان

la3lahakhier يقول...

ما شاء الله
ربنا يجعلها قرة عين لك يا رب ويجعلها نعم الذرية اللهم امين
عقبال الدكتوراة

rovy يقول...

حنان

ربنا يخليكى و يبارك فيكى ياارب

اشكر اهتمامك ببوست مريم

تحياتى

rovy يقول...

la3lahakhier

اختى الحبيبه بجد نورتينى و سعيده جدا بمرورك و تعليقك ..
بجد كانت وحشااانى طلتك الرقيقه اللى بطمنى عليكى ..
يارب يبارك فيكى و يكرمك و يتقبل دعوتك الغاليه و لكى مثلها ياارب و يجازيكى كل الخير ..و يرزقكى سعادة الدارين ياارب ..

خالص ودى و تحياتى
احبك فى الله

Khaled يقول...

الأخت الفاضلة روفى ...
ههههه
بجد البوست هايل .. ربنا يباركلك فيها وفى إخواتها ويحميهم من العين ..
بجد الفكرة هايلة وكنت ناوى أنا كمان أعمل بوست عن شلة العصبجية و لادى بس أمسيت و أصبحت مشغول فتأجلت الفكرة .. عموما ربنا يسهل و تتحقق ..
فكرتينى بأول يوم إبنى أحمد راح فية الحضانة كأنى كنت أنا إللى رايح .. هههه ...
ربنا يحمى أولادنا و يباركلنا فيهم جميعا .....
تقبلى تحياتى و مرورى لأول مرة

rovy يقول...

khaled

اخى الفاضل الفنان خالد

اسعدنى تواجدك وتعليقك الكريم ..

بارك الله لك فى اولادك و اسعدك بهم واعانك على تربيتهم ..اشكر دعواتك الغاليه و ادعو الله ان يتقبلها و لك مثلها ان شاء الله جزاك الله كل خير ..

ان شاء الله قريب تعملنا بوست نتعرف فيه على اولادك يا فنان ..

دمت بكل خير

تقديرى و امتنانى

تحياتى

غير معرف يقول...

جميله يامريم ...واجمل معندك هى ماما مرفت رقيقه وجميلهوتستهليها...خالتوا سميه

rovy يقول...

خالتو سميه

بجد مش عارفه اقولك ايه انا و مريم بنحبك جدا لكن زعلانين جدا جدا لانك نزلتى مصر و رجعتى من غير ما تشوفينا او تسألى علينا لكن برضه انتى وحشااااااااانى جدا ..
ربنا يخليلك ساجى و ساجده و احمد و يفرحك بيهم يارب و يبارك لكى فيهم و يخليكى ليهم انتى و باباهم ..

اطيب امنياتى اختى الحبيبه
و صديقة عمرى اللى مزعلانى ليكى ..

ميرفت

حاجات جوايا يقول...

بسم الله ما شاء الله
ربنا يحميها يارب ويباركلك فيها
وعقبال محمد ابنى ان شاء الله ولو انى خايفة جداااااا من اليوم ده وخايفة مرضاش انزله من البيت ههههههههه

ربنا يخليهالك وتفرحى بيها ان شاء الله عروسة ومتخرجة وام بإذن الله

أجمل سلام وتحية

سالى

rovy يقول...

حاجات جوايا

الحبيبه سالى الف حمد الله على سلامتك حقيقى وحشتينا كثير ..
الله يخليكى حبيبتى و يخلى لك ابنك و يارب تفرحى به دايما و يبارك فيه و تشوفيه عريس ..
اشكرك لدعوتك الغاليه و لكى مثلها ان شاء الله و ربنا يكرمك ويجازيكى كل خير ياارب ..

دمتى بكل خير و سعاده

تحياتى

nado يقول...

طبعا الفكره جميله قوى ومريم ماشاء الله عليها جميله قوى والصور بجد كانها بتتحرك ويارب يامريم تكون صحتك بخير وتسمعى كلام ماما وتبعدى عن الشبسى والحاجات الحلوه وتاكلى الشندوتشات عشان تبقى شاطره على طول والكل يحبك
اموووووووووووووووووووووووووه

rovy يقول...

nado

اختى الصغيره حبيبة قلبى
سعيدة بتعليقك حبيبتى و ان الصورعجبتك و ياارب افرح بيكى قريب وكمان تفرحى معايا بمريومه و نشوفها عروسه حلوه يااارب بعد ما نفرح باخواتها و ياارب ما يحرمنى منك ابدا و لا من اخواتنا ولا من ماما حبيبتى ابدا ابدا ياارب يخليكوا ليه ..

بحبك جدا جدا جدا

تحياتى

norahaty يقول...

السلام عليكم
ورحمة الله تعالى وبركاته
ربنا يخليكو لبعض وماتحرموا
من بعض ابدآ يارب وتفرحى بهم
كلهم وتبقى تحكى الذكريات دى كله
لاولادهم (يعنى احفادك )وتضحكوا كلكم
عليها .ادام الله عليكم نعمه ظاهرة وباطنة ومتعكم بالصحة والعافية .

rovy يقول...

norahaty

عليكم السلام و رحمة الله وبركاته اختى الحبيبه

اكرمك الله و اعزك و يا رب يسعدك ومن تحبين جميعا ..

دمتى بكل خير فى حفظ الله

تحياتى