تاج على الماشى ..

بسم الله نفتتح الجلسه وندعى على لا قصدى ندعى للولد المصرى اللى مرر لى التاج وياريت كلكم تدعوا ع.. لا قصدى طبعا تدعوله
وندخل فى الاسئله وربنا يستر ..
1- لو اعطيتك 3 وردات من هم الاشخاص اللى تهدى لهم الورد ده ؟
بما انى عندى 3 قمرات ربنا يخليهم لى يبقى اكيد حعطى كل واحده فيهم ورده بس اكيد حاشترى لأمى باقة ورد اعطيها لها .
2-معاك 3 سطور اكتب اللى عاوزه ؟
اللهم با ارحم الراحمين الحمد لك انك انت ربى والحمد كل الحمد لانى انا عبد لك وحدك
وكفانى عزا ان تكون لى ربا وكفانى فخرا ان اكون لك عبدا ..
انت لى كما احب فوفقنى الى ما تحب .. وصلى اللهم وسلم وبارك على الحبيب المصطفى محمد عليه افضل الصلاه والسلام .
3- ما هو هدفك فى الحياه ؟
اتمنى ان يوفقنى الله فى رعايه بناتى وان يحققوا جميع احلامهم وان احسن ربايتهم وان اكون زوجه صالحه ثم ان احاول ان احقق ذاتى
و ان تصل كتاباتى يوم لكل الناس وطبعا ده حلم مش هدف .كما اتمنى ان اخرج من الدنيا برصيد يجعل لى مكان فى جنه الخلد ويبنى به لى الرحمن بيتا بجوار الحبيب المصطفى .يااااارب .
4- ان شاء الله بكره احسن من النهارضه . هل تصدق هذه المقوله ؟
ما دمنا قلنا ان شاء الله يبقى اكيد ان شاء الله حيكون بكره احسن . ياااارب
5- ما هى اجمل مقوله سمعتها ؟
لا اله الا الله محمد رسول الله
6- مين المغنى اللى بتحبه وايه اغنيتك المفضله ؟
عمر دياب ..... معظم اغانيه
7-غزه تمثل ايه فى حياتك ؟
مثال حى لتهاون العرب وتفرقهم وانهزامهم بسبب ضعفهم
8- تعطى كام فى الميه لانتمائك للوطن ؟
1000 %
9- لو تزوجت وانجبت قول اسماء الاولاد والبنات اللى بتحبهم ؟
البنات هما ياسمينه و هدير و مريم
اما الاولاد فانا بأحب اسم عبد الرحمن وايضا احمد و يوسف
10- عمرك ما غشيت وانت صغير ؟
بصراحه انا كنت فى مدرسه رهبات وكانت لغاية الاعدادى لحد ما طلعت منها ما كنتش عارفه يعنى ايه غش لحد بقى ما صدمت بس الحمد لله كنت بأغشش اكثر ما بأغش لانى اتربيت على انى اعتمد على نفسى وما اغشش .
11- لو اتعرضت عليك رشوه وانت فى زنقه تأخذها ؟
طبعا لا وعجبنى قوى تشبيه الولد المصرى فى السؤال ده
12-قول 3 صفات فى 3 كلمات توصف بهم شخصيتك ؟
بجد مش عارفه اوصف نفسى .. بس اقدر اقول وبصدق انى بأحب الله قوى ورسوله الكريم وجميع رسله وانبيائه وبأحب بيتى وعائلتى وبحب الناس قوى ...يعنى الحب هو اهم صفه فيه . ...... وكمان مبحبش النكد ابدا لكن بأحترم الحزن المبرر .
13-اول مرتب ليك ولو حتجيب حاجه لعائلتك حتجيب ايه لكل فرد؟
حاجيب لمريومه اللعبه اللى حتبقى عليها الدور وشبطانه فيها وحأجيب لاخوتها كتب وطبعا هما اللى حينقوها علشان يقروها وحأجيب لزوجى العزيز هديه بس حسب الاحوال ساعتها .
14- اهم صفه فى شريك حياتك ؟
المشاركه و تقديره ليه .
15- المجال اللى غير دراستك بتحبه حتى لو كنت بترسم على الحيط ؟؟
الادب والكتابه والشعر وبأحب الرحلات والسباحه وايضا رياضه الجرى .
16 - بتحب السفر طب ايه المكان اللى عاوز تروحه دلوقت من غير ما تفكر ؟؟؟؟
نفسى ازور اليونان واسبانيا .... وطبعا نفسى ازور بيت الله الحرام وازور كمان قبر الرسول عليه افضل الصلاه والسلام .
17- تمرر التاج لمين ؟؟
بصراحه الموضوع متعب وانا مش عاوزه حد يدعى عليا 17 سؤال يا مفترى يا لى فى بالى على كل حال انا عاوزه اعرف مين من الزوار الكرام اللى حتجيله الشجاعه وحياخذه وله منى تحيه ولما نشوف شجاعتكم بقى .
تم بحمد الله والحمد لله